Aliu: Me programin tonë të gjitha autostradat do të përfundojnë në mandatin e parë, përfshirë edhe unazën e Kryeqytetit

Kandidati për deputet nga radhët e Lidhjes Demokratike të Kosovës, Fadil Aliu ka hedhur kritika të ashpra në drejtim të Qeverisë Kurti.

Duke folur për gjendjen në arsim, Aliu ka thënë se kjo qeveri nuk ka bërë asgjë këto 4 vite dhe këtë e dëshmon më së miri rezultati i PISA-së.

Ai në emisionin “Raport” me Naim Sadikun, ka thënë se arsyeja pse LDK-ja do t’i fitojë këto zgjedhje është sepse ka bërë një reformim dhe ka një program të avancuar.

“Një fitore bindëse e LDK-së me 9 shkurt. Programi politik i LDK-së “Rruga e Re” është me i avancuari që ka ekzistuar ndonjëherë. Kemi kandidatët me profesionistë të sferave të ndryshme dhe unë mendoj që LDK-ja do të dal fituese”, ka thënë Aliu.

Sipas tij, populli i ka parë “dështimet e Qeverisë Kurti dhe nuk ka tjetër alternativë”.

Tutje poashtu ai ka theksuar se të gjitha autostradat do të përfundojnë në mandatin e parë, përfshirë edhe unazën e Kryeqytetit me programin e LDK-së.