Ambasadori Hovenier: Pavarësia e Kosovës mbështetet nga populli amerikan që nga 1999

Ambasadori i SHBA-së në Kosovë, Jeff Hovenier, në një intervistë në CONTEXT të ATV-së ka theksuar se populli amerikan ka mbështetur vazhdimisht Kosovën, përfshirë periudhën para dhe pas krizës së vitit 1999, si dhe gjatë shpalljes së pavarësisë në vitin 2008.

Ai theksoi se kjo mbështetje ka qenë konsistente, pa marrë parasysh administratën që ka qenë në pushtet në SHBA.

Hovenier theksoi gjithashtu se, siç ndodh me çdo administratë të re amerikane, mund të ketë rishikime të politikave, siç mund të kishte ndodhur mes administratës Trump dhe asaj Biden.

Ai shprehet se për Kosovën është e rëndësishme të tregojë gatishmërinë për të qenë e përgjegjshme ndaj partnerëve të saj, duke përfshirë SHBA-në, dhe për të reaguar ndaj kërkesave të SHBA-së.

Ambasadori i SHBA-së nënvizoi nevojën për vazhdimësinë e angazhimit në dialog, duke përmendur marrëveshjen e vitit të kaluar në Bruksel dhe zbatimin e saj në Ohër, dhe theksoi se ka shpresë për një angazhim të ripërtërirë nga Kosova dhe Serbia për realizimin e detyrimeve të marrëveshjes.

Deklarata e plotë: 

“Do të thosha këtë, populli amerikan e ka mbështetur vazhdimisht popullin e Kosovës. E mbështeti para krizës së 1999-ës dhe sigurisht e mbështeti pas krizës së vitit 1999, si dhe sigurisht që e kanë bërë gjithashtu që nga viti 2008, kur Shtetet e Bashkuara ishin ndër vendet e para që njohën pavarësinë e Kosovës.

Dhe sigurisht, ne luajtëm një rol të rëndësishëm në mbështetjen e procesit që arriti pavarësinë e Kosovës, dhe kjo është, mendoj, diçka nga populli amerikan, pa marrë parasysh se cila parti apo person është në pushtet në një moment të caktuar.

Në mënyrë të pashmangshme, sa herë që një administratë e re amerikane merr detyrën, ata shikojnë çështjet e pazgjidhura dhe bëjnë disa rishikime politikash. Pra, nuk do të ishte e pazakontë që administrata Trump të merrte disa këndvështrime të ndryshme për disa nga çështjet e politikës nga ato që ka administrata Biden.

Si ambasador i SHBA-së këtu, unë nuk mund të flas për to. Nuk mund të flas se çfarë do të bëjë apo nuk do të bëjë administrata e ardhshme. Mund të them se mendoj që gjëja më e rëndësishme që Kosova të bëjë është të tregojë gatishmërinë e saj për të qenë e përgjegjshme ndaj miqve dhe partnerëve të saj, përfshirë Shtetet e Bashkuara, duke reaguar për disa gjëra specifike që i kemi kërkuar. Dhe kjo më kthen te dialogu dhe nevoja… patëm një marrëveshje mjaft të mirë vitin e kaluar në Bruksel dhe më pas aneksin e zbatimit në Ohër dhe shpresojmë të shohim, si nga Kosova ashtu edhe nga Serbia, shumë më tepër energji të ripërtërirë të shpenzuar për zbatimin e detyrimeve të ndërmarra në ato raste”./ATV