Student kosovar në Gjermani ndërton dron mbrojtës për Kosovën

Ministri i Mbrojtjes i Kosovës, Ejup Maqedonci, ka vlerësuar talentin e një studenti kosovar në Gjermani, Drit Sanaj, i cili së bashku me tri studentë të tjerë shqiptarë ka zhvilluar një dron mbrojtës.

Sanaj, i cili ndjek studimet master në Universitetin Teknik të Mynihut, ka prezantuar projektin në garën ndërkombëtare “European Defense Tech Hackathon”, e cila mbahet për herë të parë në Kosovë.

Sipas ministrit Maqedoncit, droni ka shpejtësi deri në 70 kilometra në orë dhe kapacitet bartës deri në gjashtë kilogramë.

Sanaj, i cili ka qenë i angazhuar edhe në projekte të kompanisë gjermane BMW, ka ndërprerë për disa ditë punën në Gjermani për të marrë pjesë në këtë garë.

“E dua Kosovën, qëllimi është të kthehem dhe të kontribuoj për vendin tim”,

citohet ai.

Maqedonci theksoi potencialin e të rinjve kosovarë dhe nevojën për krijimin e mundësive që ata të kontribuojnë në zhvillimin e vendit.

“Kemi të rinj të jashtëzakonshëm, brenda dhe jashtë Kosovës. Detyra jonë është t’u krijojmë mundësi që dijen dhe talentin e tyre ta kthejnë në zhvillim për vendin tonë”,

shkruan ministri.

Me pak fjalë

Student kosovar në Gjermani, Drit Sanaj, ka zhvilluar një dron mbrojtës në një garë ndërkombëtare në Kosovë. Ai ka qenë i angazhuar edhe në projekte të BMW dhe ka deklaruar dëshirën e kthimit në Kosovë për të kontribuar në zhvillimin e vendit.

Personat e përmendur

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.