Ende nuk fillon seanca, Hardinaj konsultohet me Krasniqin

Përkundër që kanë kaluar katërdhjetë minuta nga koha kur ka qenë e paraparë të nis seanca e jashtëzakonshme për votimin e qeverisë së re e njëjta ende nuk ka filluar.

Në sallën plenare nuk ka arritur kryetari i Kuvendit, Dimal Basha, si dhe mandatari për kryeministër, Albin Kurti. Po ashtu, në sallë nuk shihen të pranishëm as tre deputetët e Nisma Socialdemokrate.

Ndërkaq, të pranishëm janë deputetët nga radhët e LVV-së, PDK-së, LDK-së, AAK-së, si dhe të komuniteteve jo shumicë.
Kjo vonesë bëri që kryetari i AAK-së, Ramush Haradinaj të konsultohet me kryetarin e PDK-së, Memli Krasniqi.

Mandatari për kryeministër, Albin Kurti, do të paraqesë para deputetëve përbërjen e kabinetit qeveritar, por paraprakisht nuk ka arritur ndonjë marrëveshje politike që do t’i siguronte shumicën parlamentare.

Lëvizjes Vetëvendosje, kryetar i së cilës është Kurti, i duhen së paku edhe pesë vota që të sigurojë minimumin e nevojshëm prej 61 sosh për votimin e suksesshëm të qeverisë së re.
Në zgjedhjet e 9 shkurtit, kjo parti ka siguruar 48 deputetë në Kuvend, ndërkaq përkrahje ka siguruar edhe nga tetë deputetë të komuniteteve jo shumicë.

Para fillimit të seancës së sotme, përfaqësuesit e PDK-së, LDK-së, AAK-së dhe Nismës Socialdemokrate deklaruan se nuk do të votojnë për qeverinë Kurti III./Kosovapress/