Gazment Bardhi takim në Mallakastër: PS kandidon për deputet drejtorin e Ujësjellësit, ndërkohë fshatrat nuk kanë ujë!

Nënkryetari i Partisë Demokratike, njëkohësisht edhe drejtues politik në Qarkun e Fierit, Gazment Bardhi ka zhvilluar gjatë ditës së sotme një takim në Mallakastër.

Nga Kuta, Bardhi shprehet se është revoltuese që PS kandidon me drejtorin e Ujësjellësit, kur në zonë nuk ka ujë.

Më tej ai thekson se shpresa nuk ka humbur, pasi PD do të investojë sërish për të bërë Kutën dhe zona të tjera të Mallakastrës tërheqëse për turistët.

Postimi i Bardhit:

Shpresë për të ardhmen!

Me kandidaten tonë, Silva Hasaj, ishim në Kutë, Mallakastër, një zonë me shumë burime, por e lënë pas dore për 12 vjet. Në Kutë, një fshat që mund të zhvillojë agroturizmin, nuk ka të rinj. Banorët thonë se 90% e fshatit janë pensionistë, të tjerët janë larguar nga pamundësia për të ngritur një jetë të mirë aty. Në fakt, është kaq revoltuese që PS kandidon në zonë drejtorin e Ujëssjellësit, kur në Kutë dhe në në fshatra të tjerë nuk ka ujë.

Por shpresa nuk ka humbur! Në Mallakastër, shumë banorë të saj do të votojnë për PD. Ne investuam për ta me rrugën kombëtare dhe dhjetëra rrugë fshatrash, ne do të investojmë sërish për të bërë Kutën dhe zona të tjera të Mallakastrës tërheqëse për turistët.

Ne duam që të rinjtë të kthehen në shtëpi, të punojnë këtu dhe të pasurohen në vendin e tyre. Agroturizmi është një mundësi e shkëlqyer dhe me lehtësitë fiskale, mbështetjen financiare që ne do të sigurojmë për këdo që investon në këtë fushë, do t’i japim jetë Kutës dhe fshatrave të tjerë te Mallakastrës!