Janevska: Të gjitha paralajmërimet për bomba janë të rreme, prindërit të ndjehen të sigurt

Ministrja e Arsimit dhe Shkencës, Janevska, në konferencën për media të mbajtur sot informoi se MASh ka formuar një grup ndërsektorial për të trajtuar më efektivisht situatën pas raportimeve për mjete shpërthyese të vendosura në disa shkolla fillore dhe të mesme.

“Të gjitha raportimet janë të rreme, dhe nxënësit janë kthyer në shkollë”, tha Janevska, duke falënderuar MPB-në për reagimin e shpejtë. Ajo shprehu keqardhjen që dikush po luan me sigurinë e fëmijëve dhe u bëri thirrje drejtuesve të shkollave që të raportojnë raste të tilla në Ministrinë e Brendshme dhe të respektojnë protokollet e policisë.

Ministrja theksoi se është e rëndësishme që mësuesit dhe drejtorët të komunikojnë ekskluzivisht përmes adresave elektronike zyrtare, të krijuara nga Ministria e Arsimit, pasi siç tha ajo, raportet nuk janë marrë përmes emaileve zyrtare, por private. Për këtë qëllim, siguria është rritur me vërtetim të dyfishtë gjatë përdorimit të emaileve zyrtare.

Ajo rekomandoi që komunat, nëse kanë mundësi, të ofrojnë siguri fizike dhe video mbikëqyrje në shkolla dhe të jenë më të kujdesshme se kush dhe si hyn në shkolla.

E pyetur nëse ka informacion se kush i dërgon paralajmërimet, Janevska tha se kjo është përgjegjësi e MPB-së, por se MASH vazhdimisht komunikon me policinë për këtë rast. Gjithashtu ajo u bëri thirrje prindërve që të ndihen të sigurt pasi janë marrë të gjitha masat e nevojshme mbrojtëse.