Ministri Sulejmani në Ohër: Takim i drejtpërdrejtë me institucionet kulturore dhe prioritetet për zhvillimin e tyre

Ministri i Kulturës dhe Turizmit, Sedat Sulejmani, sot qëndron në Ohër, në vizitën e tij të parë të punës në institucionet e fushës së kulturës pas emërimit në detyrë. Në Ohër, Sulejmani vizitoi Qendrën e Kulturës dhe Bibliotekën “Grigor Përliçev”, si dhe Entin për Mbrojtjen e Monumenteve të Kulturës dhe Muzeun – Ohër.

Drejtorët e institucioneve e informuan ministrin për punën aktuale, si dhe për gjendjen dhe problemet me të cilat përballen në funksionimin e përditshëm. Gjatë bisedimeve, vëmendje e veçantë iu kushtua programeve dhe projekteve që institucionet po përgatisin për vitin e ardhshëm dhe që janë pjesë e propozim-programeve të tyre në kuadër të Programit Vjetor të Ministrisë së Kulturës dhe Turizmit. Drejtorët prezantuan planet dhe prioritetet e tyre, si dhe nevojat për përmirësimin e kushteve të punës, realizimin e përmbajtjeve cilësore programore, projekte të reja dhe krijimin e mundësive për qasje më të madhe të qytetarëve dhe vizitorëve në përmbajtjet kulturore.

Sulejmani theksoi rëndësinë e Ohrit si një nga qendrat më të rëndësishme kulturore në vend, me një trashëgimi kulturore jashtëzakonisht të pasur, por edhe me një jetë kulturore bashkëkohore dinamike dhe të dallueshme. Ai theksoi se vendosja e një komunikimi të drejtpërdrejtë dhe të vazhdueshëm me institucionet kulturore është një nga angazhimet e tij, me qëllim që, përmes njohjes së drejtpërdrejtë me punën e tyre, të evidentohen nevojat reale dhe bashkërisht të përcaktohen prioritetet për zhvillimin e tyre të mëtejshëm.

“Ohri ka një vend të veçantë në kulturën maqedonase. Këtu ndërthuren trashëgimia e pasur kulturore, tradita dhe krijimtaria bashkëkohore. Detyrimi ynë është ta ruajmë atë që kemi trashëguar, por njëkohësisht të krijojmë kushte që kultura të jetojë, të zhvillohet dhe të jetë e qasshme për të gjithë. Këtë mund ta arrijmë vetëm me institucione të fuqishme dhe me një raport partneriteti me njerëzit që çdo ditë e krijojnë dhe e ruajnë jetën kulturore”, tha Sulejmani.

Ai theksoi se Ministria e Kulturës dhe Turizmit mbetet e përkushtuar në mbështetjen e punës së institucioneve kulturore, veçanërisht në pjesën e përmbajtjeve cilësore programore, mbrojtjes dhe afirmimit të trashëgimisë kulturore dhe krijimit të kushteve për zhvillim bashkëkohor kulturor.

Vizita e punës në Ohër pasoi pas pjesëmarrjes së ministrit Sulejmani mbrëmë në koncertin përmbyllës, me të cilin u përmbyll programi muzikor i edicionit të 66-të të festivalit “Vera e Ohrit”.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.