Prindërit me mendime të ndara nëse duhet të kufizohen rrjetet sociale

Shkup, 7 shkurt – A mund të heqin dorë lehtë ose të paktën ta kufizojnë përdorimin e internetit dhe rrjeteve sociale fëmijët dhe adoleshentët, të cilët çdo ditë kalojnë orë të tëra online? Qytetarët janë të ndarë, por shumica janë skeptikë dhe pak optimistë se një vendim i tillë do të zbatohej lehtësisht tek gjenerata e tanishme, transmeton Zhurnal.mk

Ata thonë se interneti është thellësisht i pranishëm në çdo pore të shoqërisë dhe se do të duhet kohë për të krijuar zakone të reja tek fëmijët.

“T’i largosh tani nga interneti fëmijët që janë gjithë ditën online, sipas meje, është shumë e vështirë”, thotë një qytetar. Një tjetër është më optimist. “Në shumë vende tashmë po punohet për këtë çështje. Prandaj e mbështes dhe jam i bindur se mund të kufizohet”, thotë një banor i Strumicës, transmeton Zhurnal.mk

Një pjesë e qytetarëve janë edhe më të shqetësuar për ndikimet negative të përdorimit të tepruar të ekraneve, veçanërisht tek popullata më e re. Ata mendojnë se për adoleshentët nevojiten kufizime të rrepta, ndërsa për fëmijët e vegjël – ndalim i plotë i ekspozimit ndaj ekraneve.

“Jam pro, dhe jo vetëm për më të rriturit. Sidomos duhet t’u kushtohet vëmendje fëmijëve të vegjël, të cilëve u jepen ekranet në dorë për t’i qetësuar, dhe me këtë u bëhet një dëm i madh”, shton një qytetare tjetër.

Psikologia dhe psikoterapistja Mirjana Jovanovska-Stojanovska gjithashtu e mbështet peticionin online për rregullimin e hapësirës digjitale për fëmijët. Ajo vlerëson se përdorimi i rrjeteve sociale duhet të ndalohet plotësisht për fëmijët deri në moshën 14 vjeç, ndërsa deri në moshën 16 vjeç të rregullohet në mënyrë strikte, transmeton Zhurnal.mk

Sipas saj, në fillim mund të ketë rezistencë nga gjeneratat që tashmë janë aktive në rrjetet sociale, por me edukim dhe shpjegim të duhur mund të gjendet një zgjidhje e qëndrueshme.

“Ne mund t’u ofrojmë mundësi të kontrolluara – të komunikojnë, të takohen, të merren vesh për diçka, të shkëmbejnë video. Siç i mësojmë, ashtu edhe do të jetojnë”, vlerëson Jovanovska-Stojanovska.

Iniciativa me këto kërkesa nuk është e izoluar. Debate të ngjashme për kufizimin dhe rregullimin e hapësirës online për fëmijët tashmë po hapen edhe në nivel të Bashkimit Evropian, transmeton Zhurnal.mk