Zbulohet plani i Hungarisë dhe Rusisë me 12 pika: “Tradhëti e hapur”

Hungaria i drejtohet këtë të diel kutive të votimit për zgjedhjet parlamentare, ndërkohë që po shfaqen gjithnjë e më shumë prova për lidhjet e ngushta të kryeministrit Viktor Orban me Vladimir Putinin dhe përpjekjet për t’u lidhur ekonomikisht me Rusinë. Kundërshtari i tij dhe lideri i opozitës, Peter Magyar, po tenton t’i përdorë këto dëshmi kundër kryeministrit aktual, përcjell INA.

Detajet e marrëveshjes sekrete

Qeveria hungareze ka nënshkruar një marrëveshje me Rusinë për zgjerimin e lidhjeve ekonomike, tregtare, energjetike dhe kulturore mes dy vendeve, sipas dokumenteve të hartuara nga qeveria ruse të cilat i ka siguruar Politico. Këto dokumente theksojnë qartë se sa afër dëshirojnë të qëndrojnë Budapesti dhe Moska.

Ministri i Jashtëm hungarez, Peter Szijjarto, dhe Ministri rus i Shëndetësisë, Mikhail Murashko, kanë nënshkruar një plan prej 12 pikash që përcakton fushat e bashkëpunimit pas takimit të tyre në dhjetor në Moskë. Teksti, i cili nuk ishte publikuar më parë, përcakton shkallën në të cilën dy qeveritë do të koordinoheshin në fusha të ndryshme si karburanti bërthamor, edukimi dhe sporti.

Sipas njërit prej dokumenteve, Rusia dhe Hungaria kanë shqyrtuar:

Bashkëpunimin dypalësh tregtar dhe ekonomik.

Aktivitetet e përbashkëta në sektorin e energjisë, industrisë dhe shëndetësisë.

Bashkëpunimin në bujqësi, ndërtim dhe sferën humanitare.

Një nga pikat kryesore i referohet përpjekjes për të kthyer rënien e shkëmbimit tregtar, e cila erdhi si pasojë e sanksioneve të Bashkimit Evropian ndaj Rusisë për shkak të luftës në Ukrainë. Marrëveshja po ashtu u hap derën kompanive ruse për të nisur projekte të reja të energjisë elektrike dhe hidrogjenit në Hungari.

“Tradhëti e hapur”

Ndërsa Orban mburret me lidhjet e ngushta me Kremlinin, rivali i tij zgjedhor, Peter Magyar, e akuzon qeverinë për “tradhëti të hapur” ndaj interesave kombëtare.

I pyetur për përmbajtjen e dokumenteve, Szijjarto deklaroi shkurt:

“Bashkëpunimi dypalësh i Hungarisë udhëhiqet nga interesi kombëtar dhe jo nga ndonjë presion për t’u përshtatur me mediat liberale ‘mainstream’ të njëanshme.”

Sfida më e madhe e Orbanit

Orban po përballet me testin më të vështirë të sundimit të tij 16-vjeçar. Partia e tij populiste, Fidesz, aktualisht renditet pas opozitës së qendrës së djathtë, Tisza, në sondazhet e fundit. Ai ka tentuar të përdorë raportet me Moskën për të marrë vota, duke akuzuar Magyar-in se po planifikon ta tërheqë Hungarinë në luftën në Ukrainë dhe të rrezikojë qasjen në fosilet ruse.

Fushata zgjedhore hungareze është shënuar nga një seri rrjedhjesh të informacioneve strategjike, mbikëqyrje kibernetike dhe akuza për spiunazh, shkruan Politico.

Ky zbulim vjen vetëm pak ditë para se hungarezët të vendosin nëse do të vazhdojnë rrugëtimin me Orbanin apo do të zgjedhin një kurs të ri pro-evropian./INA/

The post Zbulohet plani i Hungarisë dhe Rusisë me 12 pika: “Tradhëti e hapur” appeared first on InfoShqip.com.