Bruce Springsteen publikon këngë në kujtim të Alex Prettit dhe Renee Good

Këngëtari dhe kompozitori amerikan Bruce Springsteen ka publikuar një këngë që thotë se e shkroi gjatë fundjavës në kujtim të Alex Pretti dhe Renee Good.

Ai e postoi atë në mediat sociale më herët sot.

“E shkrova këtë këngë të shtunën, e regjistrova dje dhe e publikova sot për ju në përgjigje të terrorit shtetëror që po i bëhet qytetit të Minneapolis”, shkruan ai, duke shtuar se i dedikon këngën popullit të Minneapolis si dhe viktimave Good dhe Pretti.

Kënga, e shkruar në stilin karakteristik folk të Springsteen, synon drejtpërdrejt Sekretaren e Sigurisë Kombëtare Kristi Noem dhe këshilltarin e Shtëpisë së Bardhë Steven Miller, dhe atë që ai i quan “gënjeshtrat e tyre të pista”.

Ai gjithashtu i përmend emrat e të ndjerëve në mënyrë të drejtpërdrejtë.

“Ne do të qëndrojmë për këtë tokë”, këndon ai, duke vazhduar, “Do të kujtojmë emrat e atyre që vdiqën në rrugët e Minneapolis”.