Kasami pyet Ahmetin: Në cilën rrugë të kthehemi, të Grubit, të Merkos?

Kryetari i Lëvizjes BESA, Bilall Kasami, i ka reaguar kreut të BDI-së, Ali Ahmeti, i cili nga një event sot ju ka bërë thirrje drejtuesve të VLEN-it “të kthehen në rrugën e dinjitetit dhe krenarisë”

“Në cilën rrugë të kthehemi, Ali Ahmeti? Në rrugën e Artanit Grubit, Ramiz Merkos…, rrugën e listës së zezë, në rrugën mbrapsht dhe pa dinjitet.
I turpëruar je ti, që je duke mbyllur karrierën tënde si është më keq. Shqiptarët do të ndjeheshin të dëshpëruar sikur ju të vazhdonit rrugën e qeverisjes së keqe, që dëshmohet me raste të shumta në dëm të së ardhmes së tyre”, ka shkruar Kasami.

Kryetari i BDI-së Ali Ahmeti, nga tubimi i fundvitit, i ka ftuar edhe votuesit e VLEN që t’i ndihmojnë përfaqësuesit dhe drejtuesit e koalicionit shqiptar në Qeveri që të kthehen në rrugën e dinjitetit.

“Njerëzit tanë, vëllezërit tanë të bashkuar rreth VLEN-it të reflektojnë dhe ta mbrojnë kauzën kombëtare (Marrëveshjen e Ohrit), sepse është kauzë në respektim të gjeneratave të vjetra dhe që lindin pas nesh. Dhe jo, pavarësisht se i kam kundërshtar politik, nuk dua t’i shoh të turpëruar ata (VLEN) dhe ata që i kanë votuar. Dua të bëj thirrje si një njeri që ka luftuar dhe që e do krenarinë e kombit të vet. Të gjithë ata votues, le t’i ndihmojnë, le t’i inkurajojnë drejtuesit dhe përfaqësuesit e VLEN-it që të kthehen në rrugën e dinjitetit dhe të mbrojmë të gjithë bashkë krenarinë, sepse Marrëveshja e Ohrit nuk është marrëveshje që duhet ta mbrojë vetëm Bashkimi Demokratik për Integrim, vetëm Fronti për Europë, por është vlerë që duhet mbrojtur nga të gjithë – edhe nga VMRO edhe nga LSDM bashkë me koalicionin e tyre, aq më shumë nga ata që janë bashkuar rreth VLEN-it. Ne nuk duam përplasje, por ama nuk mund të heshtim pa e thënë të vërtetën – VMRO-ja ka traditë nga e kaluara për të rekrutuar argatë, hyzmeqarë. Por nuk kanë bërë mirë. Shtetet të cilat kanë bërë përzgjedhje të hyzmeqarëve, argatëve nuk kanë përparuar, nuk janë begatuar”, tha Ahmeti.