Kërkohej nga Lituania, arrestohet në Morinë 39 vjecari nga Kosova

Shërbimet e Policisë Kufitare në Morinë, në bashkëpunim me Drejtorinë Vendore të Policisë Kukës, kanë arrestuar në hyrje të Republikës së Shqipërisë një shtetas kosovar të shpallur në kërkim ndërkombëtar.

Arrestimi u bë si rezultat i kontrolleve të shtuara dhe verifikimeve në hyrje/dalje, me qëllim parandalimin e paligjshmërive në kufi dhe ndalimin e personave që tentojnë të lëvizin ilegalisht për t’iu shmangur drejtësisë.

I arrestuari është shtetasi B. K., 39 vjeç, banues në Kosovë, i cili u kap me qëllim ekstradimi.

Nga verifikimet e kryera dhe nga informacioni i shkëmbyer me Interpol Tiranën, rezultoi se ky shtetas ishte shpallur në kërkim ndërkombëtar nga Interpol Vilnius, Lituani. Gjykata e Vilniusit e ka dënuar atë me 2 vjet e 3 muaj burgim për veprën penale “Dëmtimi i papërfillshëm i shëndetit, kërcënimi për të vrarë ose për t’i shkaktuar një personi një dëmtim të rëndë shëndeti, ose terrorizimi i një personi”.

Interpol Tirana, në bashkëpunim me autoritetet homologe lituaneze, vijon procedurat ligjore për ekstradimin e 39-vjeçarit.