Kurti paralajmëron krizë të thellë

Kryeministri i Kosovës, Albin Kurti, ka reaguar ashpër ndaj situatës politike në vend, duke akuzuar opozitën për bllokadë institucionale dhe duke paralajmëruar pasoja të rënda financiare dhe politike nëse vendi shkon sërish në zgjedhje.

Në një mesazh drejtuar qytetarëve, Kurti theksoi se pas 10 muajsh bllokadë gjatë vitit 2025, zgjedhjet e 28 dhjetorit dhanë një mesazh të qartë të popullit, i cili – sipas tij – duhet të respektohet nga të gjitha subjektet politike.

Ai bëri të ditur se legjislatura e re tashmë ka zgjedhur kryesinë e Kuvendit dhe Qeverinë, por mbetet të zgjidhet presidenti, duke kërkuar shmangien e zgjedhjeve të reja që i konsideron të panevojshme dhe të kushtueshme.

“Organizimi i zgjedhjeve do t’i kushtonte Kosovës së paku 10 milionë euro, ndërsa për shkak të mosfunksionimit të Kuvendit do të humbnim edhe dhjetëra miliona euro të tjera nga bashkësia ndërkombëtare”, theksoi Kurti.

Sipas tij, problemi kryesor mbetet sigurimi i 80 votave për zgjedhjen e presidentit, çka – siç argumenton ai – nuk zgjidhet përmes zgjedhjeve të reja.

Kurti nënvizoi se Lëvizja Vetëvendosje ka fituar 51.1% të votave dhe 57 deputetë, ndërsa me partnerët arrin në 66 deputetë, duke kërkuar që ky rezultat të reflektohet në vendimmarrje.

Ai zbuloi gjithashtu se ka bërë disa oferta konkrete për kompromis me opozitën, përfshirë bashkëqeverisje me Lidhja Demokratike e Kosovës dhe propozime për ndarje të posteve kyçe me Partia Demokratike e Kosovës, por që të gjitha janë refuzuar.

Ndër ofertat, Kurti përmendi edhe mundësinë që drejtimi i Kuvendit t’i kalojë opozitës, madje duke propozuar emra konkretë si Bedri Hamza dhe Vlora Çitaku.

Kryeministri kritikoi ashpër krerët e opozitës, duke i akuzuar se nuk duan as përgjegjësi dhe as pushtet, por vetëm të pengojnë qeverisjen.

Në fund, ai theksoi se stabiliteti institucional është jetik për vendin dhe se duhet respektuar vullneti i qytetarëve, duke bërë thirrje për arritjen e një marrëveshjeje politike që shmang zgjedhjet e përsëritura. (INA)