Maqedonia e Veriut merr pjesë në takimin e ministrave të Mbrojtjes të NATO-s, në Bruksel

Ministri i Mbrojtjes Vllado Misajlovski sot në Bruksel po merr pjesë në takimin me kolegët e tij nga vendet anëtare të NATO-s, temat kryesore të të cilit janë përgatitjet për Samitin e Aleancës në Hagë në qershor, rritja e shpenzimeve për mbrojtjen, forcimi i kapaciteteve industriale mbrojtëse transatlantike, situata në Ukrainë dhe fushata ruse e aktiviteteve destabilizuese, transmeton Portalb.mk.

Takimi do të fillojë me një seancë të Këshillit të Atlantikut të Veriut në nivel të ministrave të mbrojtjes, pasuar nga një ceremoni e nënshkrimit të Letrave të Qëllimeve dhe Memorandumeve të Mirëkuptimit për bashkëpunimin shumëkombësh.

Dreka e punës në takimin ministror do të marrë formën e një sesioni jozyrtar të Këshillit NATO-Ukrainë, ku do të marrin pjesë edhe ministri ukrainas i Mbrojtjes Rustem Umerov dhe Përfaqësuesja e Lartë e BE-së për Punët e Jashtme dhe Politikën e Mbrojtjes Kaia Kallas.

Dje, në pritje të takimit të sotëm ministror, ​​u mbajt një takim i Grupit të Kontaktit të Mbrojtjes së Ukrainës, i organizuar nga Sekretari Britanik i Shtetit për Mbrojtjen Xhon Hilli dhe ku morën pjesë ministra dhe përfaqësues të lartë të rreth 50 vendeve, përfshirë Misajllovskin, si dhe Sekretari i Përgjithshëm i NATO-s Mark Rute dhe Përfaqësuesja e Lartë e BE-së, Kallas.

Rute tha në një konferencë shtypi dje para takimit të sotëm se “Aleanca ka plane të qarta për të mbrojtur një miliard qytetarët e saj, por ne nuk kemi gjithçka që na nevojitet për t’i zbatuar plotësisht nëse është e nevojshme, ndaj duhet të vendosen synime të reja ambicioze për të forcuar aftësitë mbrojtëse që do të mundësojnë parandalimin dhe mbrojtjen”.

Rute theksoi se vitin e kaluar anëtarët e NATO-s nga Evropa dhe Kanadaja investuan 485 miliardë dollarë në mbrojtje, që është një rritje gati 20 për qind krahasuar me vitin 2023 dhe se ai pret shpenzime edhe më të larta për mbrojtjen këtë vit dhe investime shtesë për një rishpërndarje të drejtë të barrës së mbrojtjes së Aleancës. Sipas Rute, në takimin e Këshillit të Atlantikut të Veriut, ministrat do të fokusohen gjithashtu në forcimin e kapaciteteve industriale të mbrojtjes, duke përfshirë një Plan Veprimi të përditësuar të Prodhimit të Mbrojtjes.