Mashtrim: NP “Tetova Transport” nuk ofron bileta për 145 denarë, mos e klikoni linkun 

Sot (31 janar 2025) në emër të Ndërmarrjes Publike “Tetova Transport” është hapur një profil i rremë në Facebook dhe në mënyrë të rrejshme pretendon se NP “Tetova Transport” ofron bileta për 12 muaj për 145 denarë. Komuna e Tetovës dhe ndërmarrja e transportit e demantuan si të pavërtetë, shkruan Portalb.mk. 

Po shqyrtojmë një postim në rrjetin social Facebook ku shkruhet: 

Transport falas për banorët e Tetovës. 

Komuna organizon konkurs në vitin 2025 dhe ofron smart-kartelë për transport në Tetovë me vlefshmëri nga 12 muaj për vetëm 145 denarë! 

Merrni kartelë të re dhe shijoni 12 muaj udhëtim të pakufizuar për vetëm 145 denarë. 

Nxitoni, vetëm 200 kartela transporti me çmim special prej 145 denarë. 

Klikoni linkun për të mësuar më shumë.

Madje për ta bërë më bindës këtë postim, aty ka edhe komente nga profile të cilët janë të rremë ku shkruajnë: 

Çfarë duhet të bëj për të marrë kartën? 

Faleminderit për këtë promocion! Familja jonë është në vështirësi financiare, dhe ju po na ndihmoni të shpenzojmë më pak! 

Kartela arriti para disa ditesh dhe e kam testuar tashme, funksionon. 

Do të doja të merrja një kartë të tillë!!!! Faleminderit. Jemi ne pritje te dërgesës. Tashmë e kam plotësuar formularin, menaxheri thirri për të sqaruar detajet e dorëzimit! 

Ide shumë e mirë për banorët! Marr pjesë në aksion. 

Faleminderit për këtë promovim të mrekullueshëm! Ne e morëm kartelën brenda disa ditësh. 

Që kjo është e pa vërtetë e kanë demantuar nga Ndërmarrja Publike “Tetova Transport” dhe Komuna e Tetovës. Përmes një postimi të njëjtë këto dy institucione thonë: 

Ju njoftojmë se sot është krijuar një faqe e rreme në Facebook që po shpërndan informacione të pavërteta në emër të NP “Tetova Transport”. Ju bëjmë thirrje të mos bini pre e keqinformimeve dhe të merrni informacionet e sakta vetëm nga kanalet tona zyrtare. 

Gjithashtu, ju informojmë se NP “Tetova Transport” – Tetovë nuk organizon asnjë lojë shpërblyese, prandaj ju lutemi të mos bini pre e mashtrimeve të mundshme. 

Për çdo lajm apo njoftim të vërtetë, ju ftojmë të ndiqni faqen zyrtare të NP “Tetova Transport”. 

Ju lutemi që të raportoni çdo faqe të dyshimtë që shpërndan informacione të pasakta dhe të na njoftoni nëse hasni ndonjë përmbajtje të tillë. 

Faleminderit për mirëkuptimin dhe mbështetjen tuaj! 

Biletat vjetore të transportit publik në Tetovë janë nga 2,500 denarë në 9,000 denarë, varësisht nga kategoria, të cilat janë të përshkruara në detaje në ueb-faqen e ndërmarrjes.

Për të gjitha faktet e mësipërme, ne e vlerësojmë publikimin që po shqyrtojmë si të pavërtetë.