Pagat “ndizen” në Gostivar: Zjarrfikësit marrin rritje deri në 40%

Zjarrfikësit e Gostivarit më në fund marrin një “frymëmarrje” financiare. Me një marrëveshje të re të arritur me komunën, pagat e tyre bazë do të rriten deri në 40%, duke shënuar një nga përmirësimet më të mëdha për këtë profesion në nivel lokal.

Rritja nuk është e njëjtë për të gjithë, por bazohet në përvojën dhe përgjegjësinë e secilit zjarrfikës, përmes një sistemi pikësh dhe pozicionesh pune. Kjo do të thotë më shumë drejtësi në paga dhe një rritje e menjëhershme në të ardhurat mujore.

Por nuk mbaron këtu. Marrëveshja parasheh edhe një tjetër shtesë prej 21%, e cila do të shpërndahet në tri vite radhazi:

• 7% nga marsi 2026
• 7% nga marsi 2027
• 7% nga marsi 2028

Përveç pagës bazë, zjarrfikësit do të përfitojnë edhe kushte më të mira pune:

• 50% më shumë pagesë për punë gjatë ditëve të pushimit
• 5% shtesë për punë me ndërrime
• Kompensim të garantuar për orët shtesë, në para ose ditë pushimi

Kryetari i komunës, Valbon Limani, e cilësoi këtë marrëveshje si një hap të madh drejt vlerësimit të punës së zjarrfikësve, të cilët çdo ditë përballen me rreziqe për të mbrojtur qytetarët.

Në një kohë kur shpesh ankohen për kushte të vështira, kjo rritje shihet si një sinjal pozitiv për përmirësimin e statusit dhe motivimit të zjarrfikësve në Gostivar. Gazeta Flaka

The post Pagat “ndizen” në Gostivar: Zjarrfikësit marrin rritje deri në 40% appeared first on Flaka, në çdo lajm... .