Pasi disa tifozë nuk e respektuan një minutë heshtje, Federata e dënoi KF Shkëndijën
Komisioni Disiplinor në Federatën e Futbollit të Maqedonisë (FFM) ka marrë vendim për të dënuar KF Shkëndijën për shkak se disa tifozë nuk e kanë respektuar “një minutë heshtje” në përkujtim të viktimave të tragjedisë që ndodhi në Koçani, transmeton Portalb.mk. “KF Shkëndija dënohet me zhvillimin e pesë ndeshjeve të ardhshme si vendase pa praninë […]
Komisioni Disiplinor në Federatën e Futbollit të Maqedonisë (FFM) ka marrë vendim për të dënuar KF Shkëndijën për shkak se disa tifozë nuk e kanë respektuar “një minutë heshtje” në përkujtim të viktimave të tragjedisë që ndodhi në Koçani, transmeton Portalb.mk.
“KF Shkëndija dënohet me zhvillimin e pesë ndeshjeve të ardhshme si vendase pa praninë e publikut, për shkak të, siç thuhet, sjelljes së papërshtatshme të tifozëve dhe mosrespektimit të minutës së heshtjes në atë ndeshje”, njoftuan nga Shkëndija.
Ata njoftuan gjithashtu edhe dënim në vlerë prej 5 mijë euro për organizim të dobët të ndeshjes, ndërsa me një mijë euro është dënuar për pengimin e një kameramanin zyrtar.
Më 30 mars ishte zhvilluar ndeshja e javës së 25-të ndërmjet Shkëndijës dhe AP Brerës, ku disa tifozë vendas nuk e kishin respektuar “një minutë heshtje”, si një vendim i FFM-së për të përkujtuar viktimat e tragjedisë në Koçani.
Grupi i tifozëve të ekipit të Shkëndijës së Tetovës, Ballistët, më 1 prill reaguan në lidhje me paralajmërimin e Federatës së Futbollit të Maqedonisë (FFM) për të dënuar ekipin nga Tetova për shkak mosrespektimit të një minutë heshtje në ndeshjen fundit. Ekipi i Shkëndijës ishte distancuar paraprakisht nga tifozët që shkaktuan këtë incident.
Në zjarrin që ndodhi më 16 mars në një lokal nate në Koçani, kanë humbur jetën 60 persona, ndërsa kishte 196 të lënduar që trajtohen brenda dhe jashtë vendit.
