KE po bën përpjekje për të përshpejtuar pagesën e mjeteve për RMV-në nga parafinancimi

Komisioni Evropian është duke punuar në pagesën sa më të shpejtë të parafinancimit për Maqedoninë e Veriut në kuadër të Planit të Rritjes për Ballkanin Perëndimor, raporton Telma, transmeton Portalb.mk.

Zëdhënësi i KE tha se shërbimet po finalizonin hapat procedural për lirimin e fondeve në vitin 2025.

Ministri për Çështje Evropiane, Orhan Murtezani, pas autorizimit në seancën e Qeverisë së Republikës së Maqedonisë së Veriut, me 13 nëntor nënshkroi kërkesën për para-financim prej 7% në kuadër të Agjendës Reformuese të vendit. Me dërgimin e kësaj kërkese në vlerë prej 52,5 milionë euro, Maqedonia e Veriut u bë vendi i parë në rajon që ndërmerr të gjithë hapat e nevojshëm për para-financim në kuadër të mekanizmit të ri financiar evropian.

Maqedonia e dorëzoi Agjendën e Reformës në korrik 2024, e cila u miratua në tetor.

• LEXO: Ministri Murtezani nënshkroi kërkesën për para-financim: 52 milionë euro do të vijnë nga BE

Plani për Rritje për Ballkanin Perëndimor prej 6 miliardë eurosh u miratua nga Komisioni Evropian me 8 nëntor 2023. Ai bazohet në katër shtylla: forcimi i integrimit ekonomik në tregun unik të BE-së; forcimi i integrimit ekonomik brenda Ballkanit Perëndimor përmes tregut të përbashkët rajonal; përshpejtimi i reformave fundamentale dhe rritja e asistencës financiare për të ndihmuar reformat.

Në prill dhe maj 2024, Parlamenti Evropian dhe Këshilli i BE-së ranë dakord që vendet e Ballkanit Perëndimor të marrin 6 miliardë euro nga Brukseli, dy miliard do të jenë para pa kthim, ndërsa tjerat në formë të kredive.

750 milionë euro janë të destinuara për Maqedoninë e Veriut, kurse kësti i parë do të jetë shtatë përqind, përkatësisht 52.5 milionë euro.

• LEXO: Agjenda reformuese e RMV-së identifikon një sërë sfidash, BE-ja do ta monitorojë zbatimin dhe do të vendosë për parat
• LEXO: Brukseli pret që me Agjendën reformuese RMV-ja të miratojë Kod të ri Penal dhe ligj për Prokurorinë