Protestat në Koçan për tragjedinë në diskotekën “Puls”, njëra u mbajt, tjetra do të jetë më vonë
Me fotografi të viktimave, familjarët dhe të afërmit, me heshtje dhe të qara, nisën marshimin për 60 të vdekurit në diskotekën “Pulse”. Ata thanë se është koha për të ndaluar drejtësinë selektive dhe u thanë autoriteteve se sistemi i korruptuar vrau fëmijët e tyre, raporton Alsat. Pa thënë asnjë fjalë, ata dërguan mesazhet e tyre […]
Me fotografi të viktimave, familjarët dhe të afërmit, me heshtje dhe të qara, nisën marshimin për 60 të vdekurit në diskotekën “Pulse”. Ata thanë se është koha për të ndaluar drejtësinë selektive dhe u thanë autoriteteve se sistemi i korruptuar vrau fëmijët e tyre, raporton Alsat.
Pa thënë asnjë fjalë, ata dërguan mesazhet e tyre përmes pankartave ku shkruhej: “Ky nuk është një aksident, kjo është vrasje”, “Sistemi i korruptuar na vrau fëmijët”, “Marshimi për 59 engjëjt”.
Nga sheshi i Koçanit kanë kaluar pranë kafenesë së pronarit të disko “Pulse”, ku janë ndalur dhe kanë heshtur për nder të të vdekurve, për të vazhduar në Komunën e Koçanit, selinë e Ministrisë së Punëve të Brendshme në qytet, si dhe në Gjykatën Themelore.
Sot është paralajmëruar protestë edhe prej orës 15:59 nën moton “Fitimi juaj -jetët tona”, duke përshkruar rrugë të ngjashme si protesta e parë .
Në zjarrin që ndodhi më 16 mars në diskotekën “Pulse” në Koçan, jetën e humbën 59 persona, ndërsa më pas një pacient ndërroi jetë dy javë pas tragjedisë, duke e çuar numrin total të viktimave në 60. Nga zjarri mbetën 196 të lënduar që u trajtuan brenda dhe jashtë vendit.
Sipas hetimeve të deritanishme nga institucionet, diskoteka ka punuar me një sërë shkeljesh të mëdha: nuk kishte rrjet hidranti dhe mjaftueshëm aparate PP, përdoreshin materiale piroteknike në mënyrë të paligjshme, nuk kishte as leje pune të ligjshme dhe nuk ishte lidhur asnjë kontratë me shkrim mes organizatorit dhe grupit interpretues.
Prokuroria në Koçan dhe Prokuroria për Ndjekjen e Krimit të Organizuar dhe Korrupsionit kanë identifikuar si të dyshuar gjithsej 34 persona dhe tre kompani për krime të rënda kundër sigurisë publike. Ndërkaq, Ministria e Punëve të Brendshme ka ngritur kallëzime penale kundër tyre, në mesin e tyre ka ish-funksionarë shtetërorë. Në paraburgim janë 24 persona.
