Sa paguajnë bankat në Maqedoni për pagesa jashtë vendit?

Shkup, 17 shkurt – Që nga tetori i vitit të kaluar, bankat në Maqedoninë e Veriut, Shqipëri, Mal të Zi dhe Moldavi kanë nisur realizimin e transaksioneve përmes Single Euro Payments Area (SEPA), duke shënuar një hap konkret drejt konvergjencës financiare dhe ekonomike me Bashkimin Evropian.

Anëtarësimi në SEPA tashmë sjell përfitime për qytetarët dhe bizneset, të cilët paguajnë ndjeshëm më pak për transaksione në euro. Për ndërmarrjet e vogla dhe të mesme, SEPA ofron kursime të konsiderueshme dhe parashikueshmëri më të madhe të kostove në pagesat ndërkufitare. Privilegjet e SEPA vlejnë vetëm për transfere drejt vendeve anëtare.

Media Faktor ka krahasuar tarifat për transferta kreditore në euro jashtë vendit përmes bankingut elektronik – mënyra më e përdorur për pagesa ndërkombëtare – dhe konstaton se nuk ka dallime të mëdha mes bankave komerciale që ofrojnë këtë shërbim përmes SEPA. Pagesat janë dukshëm më të lira krahasuar me sistemin tradicional SWIFT (korrespondent bankar).

Tarifat sipas bankave

UNI Banka – 60 denarë për pagesa deri në 2.500 euro; mbi këtë shumë 180 denarë.

Stopanska Banka – 60 denarë deri në 500 euro; më pas nga 180 deri në 600 denarë.

NLB Banka – 60 denarë deri në 50 euro; 310 denarë për shuma më të larta; mbi 3.000 euro 620 denarë (brenda grupit NLB – 310 denarë).

Komercijalna Banka – nga 60 deri në 540 denarë (pa specifikim të qartë të kufijve në bazën e përditësuar të Narodna Banka e Maqedonisë së Veriut).

Halkbank AD Skopje – tarifë fikse 250 denarë.

Centralna Kooperativna Banka – tarifë fikse 200 denarë.

Silk Road Bank dhe ProCredit Bank – tarifë fikse 600 denarë për çdo pagesë përmes SEPA.

Bankat e tjera komerciale ende nuk e ofrojnë këtë shërbim.

Çfarë është SEPA?

SEPA është një iniciativë e Bashkimit Evropian që thjeshton pagesat në euro, duke u mundësuar individëve, bizneseve dhe institucioneve publike të kryejnë pagesa më të shpejta, më efikase, më transparente dhe më të sigurta. Proceset e standardizuara sigurojnë qartësi dhe parashikueshmëri, ndërsa pagesat në euro përpunohen brenda të njëjtës ditë ose më së voni ditën e ardhshme pune në vendet e SEPA.

Pagesat jashtë vendit përmes SEPA mund të realizohen edhe në sportelet e bankave, përveç bankingut elektronik.

The post Sa paguajnë bankat në Maqedoni për pagesa jashtë vendit? first appeared on Agjencia e Lajmeve - Zhurnal.mk.