VLEN akuzon Bujar Ahmetin për hipokrizi: Proteston kundër sistemit apo kundër axhës Ali Ahmetit?

VLEN akuzon Bujar Ahmetin për hipokrizi: Proteston kundër sistemit apo kundër axhës Ali Ahmetit?

Partia VLEN ka ngritur një reagim të ashpër ndaj pjesëmarrjes së Bujar Ahmetit në protestën e studentëve shqiptarë, duke e cilësuar këtë situatë si “ironinë më të madhe politike”. Në një deklaratë të publikuar, VLEN thekson se Bujar Ahmeti, si nipi i Ali Ahmetit, ka qenë pjesë e sistemit që ka mbajtur padrejtësitë institucionale kundër shqiptarëve.

Një sistem që vetë e mbajti padrejtësinë

Sipas VLEN, Bujar Ahmeti ka qenë zëvendës-anëtar në komisionin për provimin e jurisprudencës – një provim që zhvillohet vetëm në gjuhën maqedonase. Megjithatë, ai është parë duke protestuar për kërkesën që ky provim të mundësohet edhe në gjuhën shqipe.

“Prandaj shtrohet pyetja: kundër kujt proteston Bujar Ahmeti?” – thuhet në deklaratë. “Kundër vetvetes si pjesë e sistemit që për vite të tëra e mirëmbajti këtë padrejtësi? Apo kundër axhës së tij, Ali Ahmetit, i cili për më shumë se 22 vite ishte në pushtet dhe emëroi ministra të drejtësisë që nuk ndërmorën asnjë hap për ta zgjidhur këtë çështje?”

BDI nën kritika: Premtime pa veprime konkrete

VLEN akuzon BDI-në se për më shumë se dy dekada ka manipuluar shqiptarët me premtime për avancimin e të drejtave, ndërsa studentët shqiptarë kanë vazhduar të përballen me pengesa dhe diskriminim institucional.

“Studentët shqiptarë nuk kanë nevojë për fotografi dhe aktrim politik. Ata kanë nevojë për zgjidhje konkrete, të cilat BDI nuk i dha për 22 vite me radhë” – theksohet në deklaratë.

Një thirrje për përgjegjësi dhe zgjidhje reale

Partia VLEN vlerëson se koha e manipulimeve politike mbi çështjet kombëtare ka përfunduar, duke shtuar se qytetarët shqiptarë meritojnë përgjegjësi dhe jo hipokrizi politike.

Në fund, VLEN premton se me ardhjen e saj në pushtet, provimi i jurisprudencës do të mundësohet edhe në gjuhën shqipe, duke iu përgjigjur kështu kërkesave të studentëve.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.