VMRO dhe LSDM bashkë kundër kryetarit shqiptar në Çashkë

Në një veprim të pazakontë politik, partitë VMRO-DPMNE dhe LSDM janë bashkuar për të dorëzuar një ankesë të përbashkët në Komisionin Shtetëror Zgjedhor (KSHZ) lidhur me dy votime për Komunën e Çashkës.

Pavarësisht se të gjitha Komisionet Komunale Zgjedhore dërguan raportet e tyre që të dielën në mbrëmje, duke konfirmuar se procesi zgjedhor ka qenë i rregullt dhe demokratik, VMRO dhe LSDM po bëhen gati ta kontestojnë rezultatin përfundimtar.

Sipas rezultateve zyrtare të shpallura, kandidati shqiptar Suat Shaqiri ka siguruar 2322 vota ose mbi 50% duke fituar bindshëm ndaj dy kundërkandidatëve maqedonas.

Kandidati i LSDM-së, Goran Stonajovski, ka marrë 1110 vota, ndërsa ai i VMRO-së, Dejan Andonovsko, ka përfunduar me 1074 vota.

Burime nga terreni theksojnë se përpjekjet për të kontestuar rezultatin janë një tentativë për ta zvarritur certifikimin e fitores së Shaqirit, i cili konsiderohet si një simbol i përfaqësimit të shqiptarëve në komunat e përziera të rajonit të Vardarit.

Vendimi përfundimtar pritet të merret nga Komisioni Shtetëror Zgjedhor në ditët në vijim.

The post VMRO dhe LSDM bashkë kundër kryetarit shqiptar në Çashkë appeared first on InfoShqip.com.