Alarmet për bomba janë dërguar nga emaile të përkohshme, MPB ka vështirësi të zbulojë autorët

Ministri i Punëve të Brendshme, Pançe Toshkovski, informoi se kërcënimet me bombë që janë dërguar në shkollat ​​në vend të premten janë dërguar nga emailet e përkohshme që fshihen vetëm një orë pas dërgimit të mesazheve kërcënuese. Prandaj, siç theksoi ai, është shumë e vështirë të gjurmohet se kush është dërguesi.

Në një intervistë për 360 Gradë, ai përmendi se bëhet fjalë për kërcënime hibride që janë të rreme, por nuk përjashtohet nevoja që MPB të përgjigjet me një hetim të plotë të akuzave.

“Këto janë kërcënime hibride që rezultuan të rreme, jo vetëm të premten, por edhe kur i kishim më parë. Fakti është se kërcënimet e fundit të drejtuara ndaj shkollave janë nga emailet e përkohshme që hapen nga individë të caktuar keqdashës. Dhe, sipas informacioneve që kam marrë, mendoj se ato emaile nga të cilat janë dërguar mesazhet kërcënuese fshihen brenda një ore. Pra, është shumë e vështirë të gjurmohet se kush i dërgon mesazhet kërcënuese”, tha Toshkovski.

Ai shtoi se shtabi operativ i krijuar për raportimin e bombave ka përfunduar që t’i dorëzojë rekomandime Ministrisë së Arsimit dhe të gjitha institucioneve arsimore se si të mbrohet perimetri i shkollave gjatë orëve të mësimit kur nuk ka nxënës, si dhe rekomandime që shërbimet e sigurisë të jenë vigjilente në perimetrin e shkollave.

“Kemi shtuar shërbimet e patrullimit që patrullojnë rreth çdo shkolle. Ne po mundohemi të mbulojmë sa më shumë terrenin me resurset që kemi, kemi dhënë rekomandime për të gjitha gjërat e tjera që duhet të ndërmerren nga aspekti teknik në Ministrinë e Arsimit dhe konkretisht për të gjitha shkollat. Në të ardhmen, policia do të përgjigjet në mënyrë më të përshtatshme, ndryshe nga mënyra se si u përgjigj në të kaluarën ndaj këtyre lloj sfidave. Faktet thonë se të gjitha raportet e deritanishme kanë qenë të rreme, por nuk përjashtohet nevoja që MPB-ja të përgjigjet me hetim të plotë të akuzave”, shtoi Toshkovski.

The post Alarmet për bomba janë dërguar nga emaile të përkohshme, MPB ka vështirësi të zbulojë autorët appeared first on Flaka, në çdo lajm... .