Ylli i Eurovisionit, Clodagh Rodgers, ndërron jetë në moshën 78-vjeçare

Clodagh Rodgers, këngëtarja ikonike që përfaqësoi Britaninë e Madhe në Eurovisionin e vitit 1971, ka ndërruar jetë në moshën 78-vjeçare pas një sëmundjeje trevjeçare.

Ajo vdiq e qetë të premten, e rrethuar nga familja në shtëpinë e saj në Cobham.

Rodgers u bë e njohur ndërkombëtarisht me këngën “Jack In The Box”, e cila e çoi në vendin e katërt në Eurovision dhe në top listat britanike.

Gjatë karrierës së saj të gjatë, ajo pati disa hite të mëdha, përfshirë “Come Back and Shake Me” dhe “Goodnight Midnight”.

Djali i saj, Sam Sorbie, i bëri homazhe në një postim emocional, duke e përshkruar nënën si “shkëmbin e familjes” dhe një grua që ia kushtoi jetën fëmijëve të saj.

E lindur në Warrenpoint, Irlandë e Veriut, Rodgers nisi karrierën në moshën 13-vjeçare dhe u bë një figurë e njohur në televizion dhe muzikë.

Pas një pauze për t’iu përkushtuar familjes, ajo u rikthye më vonë në skenë si aktore në muzikale dhe seriale televizive.

Fansat dhe kolegët i kanë shprehur ngushëllimet, duke e kujtuar si një artiste frymëzuese që do të mungojë shumë.