Armatosja e Kroacisë, alarmohet Vuçiç: Është një fushatë e përhershme kundër serbëve dhe Serbisë

Presidenti serb Aleksandër Vuçiç tha se Serbia mbetet në rrugën evropiane, por vlerësoi se në të vërtetë nuk ka mbështetjen e asnjë fuqie të madhe, duke theksuar se Beogradi priste zhvillime të mëdha në marrëdhënie nga administrata e re amerikane, por edhe kjo mungonte.

Duke folur në konferencën e rregullt vjetore për përfaqësuesit e rrjetit diplomatik-konsullor, Vuçiç tha se Serbia nuk mund ta ndiente përparimin e pritur në marrëdhëniet me Shtetet e Bashkuara, as kur bëhet fjalë për doganat, as për sanksionet ndaj Industrisë së Naftës së Serbisë (NIS), një kompani me shumicë në pronësi të Rusisë. Në kontekstin e marrëdhënieve rajonale, ai tha se “po ndodhin shumë gjëra” në aspektin e armatosjes dhe krijimit të aleancave ushtarake, duke iu referuar bashkëpunimit midis Kosovës, Shqipërisë dhe Kroacisë.

“Pse ka kaq shumë armatim të Republikës së Kroacisë? Një fushatë e vazhdueshme dhe e përhershme kundër Republikës së Serbisë dhe kundër popullit serb dhe të gjithë përfaqësuesve të Serbisë?” pyeti Vuçiç, duke deklaruar se të gjitha vendet në rajon janë ose në NATO ose në rrugën e NATO-s, siç është Bosnja dhe Hercegovina. Vuçiç vlerësoi se, për shkak të mbrojtjes së krahut lindor në një konflikt të mundshëm me Federatën Ruse, trupat po grumbullohen rreth Serbisë. “Është detyra jonë, dhe e të gjithë atyre që janë të përfshirë në politikë, të ruajmë paqen dhe të kuptojmë mirë se çfarë po na bëhet, por të reagojmë ndaj saj në mënyrë paqësore, të qetë dhe të duruar”, theksoi Vuçiç, duke vlerësuar se Serbia ka nevojë për “një shekull paqe, stabilitet dhe siguri” për qytetarët e saj. “Ky është qëllimi ynë i pare, ruajtja e paqes dhe stabilitetit”, tha Vuçiç.

The post Armatosja e Kroacisë, alarmohet Vuçiç: Është një fushatë e përhershme kundër serbëve dhe Serbisë appeared first on InfoShqip.com.