Bekim Sali emërohet zëvendëskryeministër i parë, zëvendëson Izet Mexhitin

Qeveria e Maqedonisë së Veriut ka bërë sot një ndryshim të rëndësishëm në përbërjen e saj, duke emëruar Bekim Salin nga koalicioni VLEN në postin e zëvendëskryeministrit të parë. Ky emërim vjen pas largimit të Izet Mexhitit nga kjo detyrë, i cili në zgjedhjet lokale të 19 tetorit u zgjodh kryetar i Komunës së Çairit.

Pas vendimit të qeverisë, Sali reagoi përmes një postimi në Facebook, ku theksoi se pozita e re për të nuk përfaqëson thjesht një funksion shtetëror, por një përgjegjësi të madhe morale dhe kombëtare. Ai theksoi se besimi i dhënë nga institucionet dhe qytetarët e obligon që të punojë pa dallim për interesin e të gjithëve.

Duke bërë një përmbledhje të punës së qeverisë gjatë dy viteve të fundit, Sali vuri në pah disa nga rezultatet konkrete, si punësimi i mijëra të rinjve, mbështetja financiare për komunat, investimet në arsim përmes Kampusit të Universitetit “Nënë Tereza”, si dhe zgjidhjen e çështjeve të hapura me rëndësi shoqërore. Ai theksoi se këto arritje janë dëshmi se angazhimi institucional mund të prodhojë rezultate të prekshme.

Sali nënvizoi se sfidat mbeten të shumta dhe se periudha e ardhshme do të kërkojë angazhim edhe më të madh për realizimin e projekteve të mbetura. “Koha nuk pret”, shkruan ai, duke shtuar se prioritet do të jetë shndërrimi i premtimeve në veprime konkrete.

Në fund të mesazhit të tij, Bekim Sali shprehu besimin se me përkushtim dhe bashkëpunim, qeveria do të arrijë të përmbushë pritshmëritë e qytetarëve dhe të dalë faqebardhë përballë tyre dhe historisë.

The post Bekim Sali emërohet zëvendëskryeministër i parë, zëvendëson Izet Mexhitin appeared first on Flaka, në çdo lajm... .