Deanoski: Nëse Qeveria e RMV-së do të donte dialog, ne do të ishim në tavolinë deri më tani e jo në rrugë
Në vend që të shkruajë kumtesa dhe të mohojë gjithçka që themi, gjë që nuk është aspak e drejtë, qeveria duhet të gjejë një mënyrë për ta zgjidhur këtë problem. Nëse qeveria do të donte dialog, ne do të ishim ulur në tavolinë deri më tani dhe nuk do të ishim në rrugë. Kështu deklaroi […]
Në vend që të shkruajë kumtesa dhe të mohojë gjithçka që themi, gjë që nuk është aspak e drejtë, qeveria duhet të gjejë një mënyrë për ta zgjidhur këtë problem. Nëse qeveria do të donte dialog, ne do të ishim ulur në tavolinë deri më tani dhe nuk do të ishim në rrugë. Kështu deklaroi sot kryetari i Sindikatës së punëtorëve të administratës, organeve gjyqësore dhe shoqatave të qytetarëve (SPAOGj), Trpe Deanoski, në ditën e tretë të protestës së punëtorëve në gjashtë ministri dhe dy institucione, të cilët kërkojnë 30 përqind rritje të pagave të tyre, transmeton Portalb.mk.
Deklarata e Deanoskit vjen pasi Qeveria dje, përmes një njoftimi me shkrim, të dërguar pas protestës gjysmë orëshe të punëtorëve, tha se janë të gatshëm të ulen dhe t’i shqyrtojnë të gjitha propozimet e sindikatave për të arritur marrëveshje.
Sipas Deanoskit, deri më tani kanë përfunduar të gjitha takimet me ministrat përkatës nga ku kanë marrë mbështetje dhe janë bërë marrëveshjet kolektive, por siç tha ai nuk janë nënshkruar.
“Kjo do të thotë se as ministrat për momentin nuk kanë kompetenca për të nënshkruar marrëveshje kolektive, edhe pse nuk ka asnjë pengesë ligjore dhe kushtetuese për të”, tha Deanoski, i cili deklaratën e bëri sot para objektit të Entit Shtetëror për Statistikave ku protestuan punonjësit e këtij institucioni.
Deanoski gjithashtu informoi se deri më sot 988 punëtorë në të gjitha inspektoratet në vend nuk e kanë marrë ende pagën për muajin dhjetor.
“Për shkak të vonesës së Ministrisë së Financave, e cila nuk i ka marrë me kohë detyrimet dhe në përputhje me ndryshimet ligjore, ka lënë pa paga 988 punonjës, pa fatura të paguara në muajin më të gjatë. Dje ka skaduar edhe afati ligjor për pagesën e pagave dhe ende nuk ka informacion se kur dhe nëse do t’i marrin pagat punëtorët në inspektorate”, tha Deanoski.
I pyetur se si do të vazhdojnë nga nesër, kur thanë se do të jetë dita e fundit e protestave, Deanoski tha se sot do të kenë takim me anëtarët e sindikatave që dalin në protesta dhe do të vendosin se si do të vazhdojnë dhe nëse do të marrin ndonjë masë tjetër.
I pyetur nëse ka presion që të punësuarit të mos dalin në protestë, Deanoski tha se raste të tilla ka në disa ministri, por në Entin Shtetëror të Statistikave nuk është kështu.
“Këtu përballë ESHS-së ka një numër të madh të të punësuarve dhe këtu nuk ka presion, madje kemi marrëdhënie dhe bashkëpunim të mirë me drejtorin. Në disa ministri ka presione, por do të vendosim nëse do të themi se kush dhe si po bëjnë presion”, tha Deanoski.
Lidhur me atë se a ka njoftim për mbajtjen e seancës së Këshillit Ekonomiko-Social (KES), në të cilën Qeveria dje tha se merr pjesë SPAOGj, Deanoski tha se për momentin nuk ka.
“Ajo që tha dje Qeveria se SPAOGj po vjen në seancën e KES është e vërtetë, ne marrim pjesë, por duhet ditur që në një seancë të KES nuk mund të diskutohet për çështjet e pagave për punëtorët e ESHS-së, ministrive. Në një seancë të KES-it diskutohen dhe zgjidhen çështje më të mëdha si Kontrata e Përgjithshme Kolektive apo masa e pagës minimale. Këto kërkesa të punëtorëve që dalin të protestojnë zgjidhen ose me ministrat e linjës dhe drejtorin, por me pëlqimin e Ministrisë së Financave të na lejojë që të shfrytëzojmë mjetet që i kemi në buxhet”, tha Deanoski.
Qeveria këmbëngul se “protestat janë politikisht të motivuara, se pagat nuk janë të larta, por mundësitë e buxhetit janë të kufizuara”.
“Protestat nuk janë mënyra më e mirë e komunikimit, Qeveria është e hapur për të arritur një marrëveshje me të gjitha organizatat sindikale përmes dialogut. Çdo propozim ose sugjerim nga sindikatat diskutohet, me qëllim që të gjendet një zgjidhje e pranueshme dhe në interes të qytetarëve. Vitin e kaluar edhe përskaj gjendjes katastrofike që trashëguam nga Qeveria e kaluar, së bashku me sindikatat arritëm marrëveshje për rritjen e pagave për punonjësit në shëndetësi dhe arsim dhe gjithashtu rritëm pensionet për mbi 300.000 pensionistë në mënyrë lineare. Qeveria e kaluar gjatë përgatitjes së Buxhetit për vitin 2024 nuk kishte parashikuar mjete për pagesën e K-15 për punonjësit në administratë, ndërsa me rishikimin e Buxhetit, kjo Qeveri i parashikoi dhe i pagoi K-15 për 84.000 punonjës në vlerë prej 1 miliard denarë. Për gjashtë muaj si Qeveri kemi bërë shumë më tepër për qytetarët se sa ajo që bëri Qeveria e kaluar për 7 vjet. Nëse AOJSH vërtet kujdesen për pagat e punonjësve, i ftojmë ata për bisedime me qëllim që të gjejmë zgjidhje të vërteta. Përndryshe mbetet dyshimi se AOJSH është organizatë sindikale që punon për interesa të partive të caktuara, të cilat nuk mendojnë asgjë tjetër veçse për të grumbulluar pikë politike në kurriz të qytetarëve”, thonë nga Qeveria.
Kjo është dita e tretë që punonjësit e këtyre ministrive dhe institucioneve dalin në protestë gjysmë ore para godinave. Nesër punonjësit do të protestojnë para Ministrisë së Financave.
Kujtojmë se edhe punonjësit e Avokaturës Shtetërore përmes grevës kërkojnë nënshkrimin e një marrëveshjeje kolektive që parashikon rritje shtesë të pagave me 30 përqind.
Nga Avokatura Shtetërore thanë se të gjitha prokuroritë në vend janë në grevë dhe se kjo do të vazhdojë deri në plotësimin e kërkesave.
