Durmishi: Deri në fund të këtij muaji pritet të përfundojë metodologjia e re për shportën e konsumit

Më së voni deri në fund të këtij muaji duhet të përfundojë metodologjia e re për llogaritjen e shpenzimeve minimale të një familjeje, njofton ministri i Ekonomisë dhe Punës, Besar Durmishi.

Në një intervistë për televizionin “Sitel” mbrëmjen e sotme, ai deklaroi se dje në Ministrinë e Ekonomisë dhe Punës është mbajtur një takim, ndërsa do të pasojnë edhe disa të tjera, pas së cilave metodologjia e re do të prezantohet në seancën e Këshillit Ekonomiko-Social. Sipas Durmishit, në shportën sindikale të konsumit ka produkte që nuk duhet të jenë pjesë e shportës bazë të konsumit.

Dje patëm një takim në Ministrinë e Ekonomisë dhe Punës, ku ishin të pranishëm përfaqësues nga ministritë e Financave dhe Bujqësisë, nga Dogana, nga Enti Shtetëror i Statistikave dhe nga Inspektorati i Tregut. Ishte takimi i parë për të krijuar një metodologji të re për matjen e shportës minimale të konsumit, sepse në shportën sindikale të konsumit ka produkte që nuk e kanë vendin aty. Ka shumë produkte që nuk konsumohen, por janë përfshirë, si p.sh. kafeja instant, dhe janë marrë çmimet nga blerjet online. Duhet të merren çmimet nga tre markete dhe të llogaritet një çmim mesatar – tha Durmishi.
Sa i përket pagës minimale, e cila në mars pritet të harmonizohet, Durmishi tha se ajo do të rritet në përputhje me ligjin. Nëse sindikatat kërkojnë një nivel tjetër të pagës minimale, duhet të bien dakord me punëdhënësit, ndërsa Qeveria do ta mbështesë këtë zgjidhje, por do të shqyrtohen edhe pasojat financiare.

Lidhur me ndryshimet në Ligjin për ditën e diel si ditë pushimi, Durmishi theksoi se disa sektorë duhet të kenë të drejtën të punojnë të dielën, por jo që ajo të hiqet plotësisht si ditë pushimi.

Për shkak se disa sindikata kanë humbur të drejtën e përfaqësimit, duhet të shtohen sindikata të reja që do të jenë përfaqësuese. Javën e kaluar nuk kishim bazë për të marrë një vendim. Derisa të vendoset se cilat do të jenë sindikatat e reja përfaqësuese, nuk mund të marrim një vendim – tha Durmishi.