“Folea” me dyer të mbyllura për fëmijët, procedurat institucionale zvarrisin hapjen e çerdhes në Komunën e Tearcës
Çerdhja në fshatin Përshefcë të Komunës së Tearcës ende nuk i ka hapur dyert, as pas mbi tre viteve që nga fillimi i punimeve. Kjo për shkak se ende nuk janë mbaruar procedurat midis institucioneve, shkruan Portalb.mk. Ky objekt duhej të ishte gati që në vitin 2023 mirëpo zvarritja e procedurave nga ana e autoriteteve ka bërë […]
Çerdhja në fshatin Përshefcë të Komunës së Tearcës ende nuk i ka hapur dyert, as pas mbi tre viteve që nga fillimi i punimeve. Kjo për shkak se ende nuk janë mbaruar procedurat midis institucioneve, shkruan Portalb.mk.
Ky objekt duhej të ishte gati që në vitin 2023 mirëpo zvarritja e procedurave nga ana e autoriteteve ka bërë që kjo çerdhe ende të jetë e mbyllur.
Prindërit e mbi 150 fëmijëve me vite presin që çerdhja t’i hapë dyert.
Çerdhja nuk është lëshuar në përdorim ende, pasi siç thotë kryetari i Komunës së Tearcës , Nuhi Neziri për Portalb.mk, ende nuk kanë marrë përgjigje nga Ministria e Administratës në lidhje me dokumentacionin që ua kanë dërguar për të marrë pëlqim.
Nga Komuna e Tearcës sqaruan se më date 14.03.2025 i kanë dërguar te Ministria e Administratës dokumentet e nevojshme për pëlqim.
“Ende nuk kemi përgjigje nga ana e tyre. Ne i kemi përgatitur të gjitha dokumentacionet siç janë: rregullorja e brendshme, rregullorja për sistematizimin e vendeve të punës, analiza funksionale e objektit të çerdhes, është formuar këshilli drejtues dhe i njëjti i ka miratuar aktet e përmendura.
Kemi vonesa në përgjigje nga ana e institucioneve relevante”, thanë nga Komuna e Tearcës.
Ata shtuan se si institucion i kanë mbaruar të gjitha detyrat e tyre, ndërsa problemi qëndron te vonesa e përgjigjeve nga institucionet tjera.
Nga Ministria e Administratës për Portalb.mk thanë se çerdhja “Folea” Tearcë ka dorëzuar akte të reja, duke përfshirë analizën funksionale, rregulloren e sistematizimit dhe organizimin e brendshëm, pasi është çerdhe e re. Por nuk treguan se kur konkretisht do të japin pëlqim.
“Në përputhje me procedurat ligjore, i gjithë dokumentacioni i gjerë kontrollohet në detaje. Procedura e pëlqimit elektronik është në vazhdim e sipër dhe do të vazhdojë deri në pëlqimin përfundimtar të saj. Ministria vepron brenda afateve dhe procedurave ligjore, pa asnjë refuzim të pëlqimit”, thanë nga Ministria e Administratës.
Nga Ministria e Politikës Sociale theksuan për Portalb.mk se çerdhja në Tearcë ende nuk është vënë në funksion për shkak se janë duke vazhduar procedurat administrative në kompetencë të komunës së Tearcës në bashkëpunim me disa ministri kompetente për sigurimin e personelit të nevojshëm dhe sigurimin e mjeteve financiare për punën e çerdhes.
“Gjegjësisht, është duke u zhvilluar procedura për marrjen e pëlqimit me shkrim nga institucionet kompetente për sistematizimin dhe Aktin e Organizimit të Brendshëm për çerdhen. Në periudhën në vijim (prill – maj 2025) kërkohet miratimi i planit vjetor financiar për personelin ndihmës dhe administrativ (jo për kujdestaret) për çerdhen si dhe miratimi i mjeteve financiare – bllok dotacioneve për çerdhen”, thanë nga Ministria e Politikës Sociale.
Paraprakisht, Ministria e Politikës Sociale ka dhënë leje për fillimin me punë të çerdhes, ndërsa kanë theksuar se çerdhja pritet të nisë funksionimin në gjysmën e parë të vitit 2025 por pa specifikuar datë konkrete.
- LEXO: Çerdhja në Komunën e Tearcës mori leje, por institucionet nuk e tregojnë datën kur do të hapet
- LEXO: Tre vite pas fillimit të punimeve, prindërit e mbi 150 fëmijëve në Komunën e Tearcës ende presin që çerdhja t’i hapë dyert
Ndërtimi i çerdhes në fshatin Përshefcë të Komunës së Tearcës filloi në fillim të vitit 20221, ndërsa objekti përfundoi në janar 2023. Ky objekt duhej të ishte gati që në prill 2023, por kjo nuk ndodhi. Faji për këtë vonesë sipas autoriteteve komunale mbeti te rrjeti i ujësjellësit.
Objekti i çerdhes ka sipërfaqe prej 1400 metra katrorë në parcelë të përgjithshme prej 6935 metra katrorë, dhe ka kapacitet për 155 fëmijë nga mosha 0 deri në 6 vjeç.
Ndërtimi i kësaj çerdheje është e bashkëfinancuar nga Bashkimi Evropian nëpërmjet Instrumentit të Asistencës së Para-Aderimit (IPA 2). Vlera e këtij projekti është rreth 980 mijë euro.
Investitorë në këtë projekt janë IPA- 2 Programi, Ministria e Financave- Departamenti (CFCD) dhe Ministria për Punë dhe Politikë Sociale.
Realizues të punëve ndërtimore janë AK-Invest-Tetovë, ndërsa mbikëqyrës të punëve ndërtimore janë EuroConsult LTD-Shkup.
