Gjenerali kryesor amerikan për Evropë flet për rritje të forcave të përhershme në Kosovë: Shpresoj të kemi marrëveshje shumë shpejt

Një prej gjeneralëve kryesorë amerikanë, Christopher Cavoli, duke raportuar para Senatit amerikan për forcat amerikane dhe për situatën e sigurisë nëpër vendet ku ato janë të dislokuara, ka përmendur edhe rajonin e Ballkanit Perëndimor, përkatësisht Kosovën dhe Bosnje e Hercegovinën, si dy vendet që vazhdojnë të kenë ende shqetësime të sigurisë dhe stabilitetit, shkruan Gazeta Express.

Cavoli ka treguar numrin e përgjithshëm të trupave të KFOR-it në Kosovë, ku SHBA-ja kontribuon me rreth 600 ushtarë, dhe gjithashtu ka përmendur disa prej shteteve që japin kontribut më të lartë në KFOR sa i përket numrit të ushtarëve, sikurse Italia.

Ai ka thënë se SHBA ka dislokuar forca rezerve për t’u marrë me tensionet e rritura në vitin e fundit në Kosovë, derisa ka treguar se synojnë zgjerimin e numrit të përhershëm të forcave në Kosovë, për të liruar trupat rezervë.

Gjenerali amerikan ka shtuar se pret të arrihet marrëveshje për këtë shumë shpejt.

Sa i përket dislokimit të trupave rezervë në Kosovë, ai ka përmendur Turqinë, Hungarinë, Mbretërinë e Bashkuar dhe Italia, duke i cilësuar si mjaft të përgjegjshme sa i përket forcave rezervë./GazetaExpress/