Ibrahimi: Distancimi i Ostrenit nga Ahmeti nuk e shfajëson atë nga përgjegjësia politike

Ish lideri i Alternativës, Zeqirija Ibrahimi, ka reaguar ndaj deklaratave të Gëzim Ostrenit për Marrëveshjen e Ohrit dhe çështjen e gjuhës shqipe, duke thënë se pranimi i dështimit të objektivave të luftës së vitit 2001 duhet të pasohet edhe me përgjegjësi politike nga Ali Ahmeti.

“Megjithëse sot duket atraktiv, pohimi i Gëzim Ostrenit se Ali Ahmeti, me Marrëveshjen e Ohrit, nuk e zgjidhi çështjen e gjuhës shqipe, nuk është kurrfarë risie. Këtë e kemi thënë kaherë, madje edhe atëherë kur gjenerali ishte në BDI dhe ia mbante ison ‘kryetarit’”, shkruan Ibrahimi.

Ai thekson se distancimi i Ostrenit nga ish kryetari i tij nuk e shfajëson nga përgjegjësia politike.

“Për hir të së vërtetës, distancimi i Ostrenit nga ish kryetari i tij nuk e shfajëson atë, ndërsa vonesa 25-vjeçare e pranimit të fajit, në vend që të jetë katarzë, është mëkat. Megjithatë, më mirë vonë se kurrë”, shprehet Ibrahimi.

Sipas tij, pas pranimit nga ish shefi i Shtabit të përgjithshëm të UÇK-së se objektivat e luftës nuk janë realizuar, radha për të dhënë përgjigje i takon edhe ish përfaqësuesit politik të UÇK-së dhe kryetarit të BDI-së, Ali Ahmetit.

“E pasi që ish shefi i Shtabit të përgjithshëm të UÇK-së e ka pranuar se kanë dështuar në objektivat e luftës, pas kësaj është e rendit të përgjigjet edhe vetë ish përfaqësuesi politik i UÇK-së së djeshme dhe kryetari i BDI-së së sotme se për çfarë u bë lufta në vitin 2001 dhe si ndodhi që shqiptarët hynë në atë përballje me synimin e ‘bashkimit të trojeve etnike’ dhe përfunduan në ‘shtetin unitar’”, shkruan ai.

Ibrahimi ngre gjithashtu pyetje për ndryshimet në statusin juridik dhe politik të shqiptarëve në Maqedoninë e Veriut pas konfliktit të vitit 2001.

“Si dhe si u bë që nga ‘pakicë kombëtare’ (para vitit 2001) përfunduan në ‘bashkësi etnike’ apo nga ‘gjuha e pakicës’ kaluan në ‘gjuhën që e flasin 20% e popullatës, e që nuk është e njëjtë me maqedonishten’?”, pyet Ibrahimi.

Në fund, ish lideri i Alternativës e përmbyll reagimin me një mesazh kritik ndaj zhvillimeve politike të këtyre 25 viteve.

“Këto janë ato çastet kur të vjen keq që ke pasur të drejtë”, nënvizon Ibrahimi.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.