“Interneti do të fiket dhe bankat do të bien më 17 nëntor”: Ekspertët qetësojnë opinionin pas alarmit që pushtoi rrjetet sociale!

Në rrjetet sociale në mbarë botën po shpërndahet me shpejtësi një paralajmërim shqetësues që ka nxitur valë paniku te miliona përdorues, ku pretendohet se më 17 nëntor do të ndodhë sulmi më i madh kibernetik në historinë e njerëzimit, përcjell portali Novi.ba.

Sipas këtyre publikimeve virale që po qarkullojnë masivisht, hakerë të panjohur dyshohet se do të depërtojnë njëkohësisht në sistemet e bankave më të mëdha botërore, do të fshijnë të gjitha të dhënat mbi paratë e klientëve duke i lënë llogaritë në zero, dhe menjëherë pas kësaj do të shkaktojnë një fikje të plotë të internetit në të gjithë planetin për plot tre muaj.

Kjo histori, e cila po cilësohet si një “apokalips digjital”, rrodhi nga llogari anonime që pretendojnë se kanë zbuluar informacione sekrete nga ana e errët e internetit (darknet), ndërsa disa përdorues madje u kanë bërë thirrje njerëzve të grumbullojnë ushqime, ujë, para në dorë dhe ar për të përballuar bllokadën e gjatë.
Megjithatë, ekspertët e sigurisë kibernetike dhe platformat e verifikimit të fakteve kanë ndërhyrë menjëherë për të qetësuar opinionin publik, duke sqaruar se ky skenar është tërësisht i pamundur nga ana teknike dhe përfaqëson vetëm një teori konspirative të paverifikuar. Specialistët e rrjeteve shpjegojnë se interneti global nuk funksionon si një sistem i vetëm me një buton qendror që mund të fiket me një lëvizje, por përbëhet nga dhjetëra mijëra rrjete të pavarura dhe të ndërlidhura në mbarë botën. Në mënyrë të ngjashme, bankat dhe institucionet financiare përdorin sisteme shumë-shtresore të mbrojtjes dhe kopje rezervë (backup) të ruajtura në lokacione të ndryshme gjeografike, gjë që e bën të pamundur fshirjen e të dhënave bankare globale.

Ekspertët po ashtu zbulojnë se data 17 nëntor është shfrytëzuar me qëllim për të nxitur panik pasi përkohet me një test rutinor të sistemit kombëtar të alarmeve emergjente (EAS) në Shtetet e Bashkuara, i cili nuk ka asnjë lidhje me sigurinë e internetit apo të bankave. Për këtë arsye, autoritetet bëjnë thirrje që qytetarët të mos bien pre e dezinformatave dhe të shmangin përhapjen e frikës së panevojshme në rrjet.(INA)

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.