Lindsay Lohan shkëlqen në CinemaCon: Pranon çmimin Vanguard dhe promovon ‘Freakier Friday’

Lindsay Lohan tërhoqi vëmendjen në CinemaCon në Las Vegas, ku u nderua me çmimin prestigjioz Vanguard.

Aktorja 38-vjeçare u shfaq mahnitëse me një fustan të zi elegant që theksonte linjat e saj, ndërsa e kompletoi pamjen me një gjerdan diamanti dhe flokët e stiluar në valë klasike.

Duke pranuar çmimin, Lohan tha me emocion: “Ky çmim ka një domethënie të veçantë për mua. Kam kaluar gjithë jetën në këtë industri dhe jam krenare që vazhdoj të bëj atë që dua. Magjia e kinemasë është e pazëvendësueshme”, shkruan DailyMail.

Ngjarja shënoi gjithashtu promovimin e vazhdimit të shumëpritur të filmit kult ‘Freaky Friday’, ku ajo rikthehet përkrah Jamie Lee Curtis. Filmi, i titulluar ‘Freakier Friday’, pritet të dalë në kinema më 8 gusht 2025.

Përveç fustanit të zi klasik, Lohan ndryshoi disa herë veshjen, duke u shfaqur edhe me një fustan mini livando dhe një tjetër jeshil smerald.

Pamja e saj rinore ka tërhequr vëmendjen e publikut dhe ekspertëve të bukurisë, të cilët spekulojnë mbi trajtime estetike të mundshme. Megjithatë, aktorja nuk ka komentuar mbi këto aludime.

Ndërkohë, Curtis e përshkroi filmin si një përvojë që duhet shijuar në kinema: “E kemi bërë këtë film me shumë dashuri, dhe mënyra më e mirë për ta parë është në ekranin e madh, me një audiencë të madhe”.