“Ndërmarrja më e vështirë e jetës”, historiania Elena Kocaqi prezanton partinë e re

Historiania e njohur Elena Kocaqi dhe Inida Gjata apo siç e njohim, Zhaku kanë themeluar një parti të quajtur Aleanca Kombëtare Shqiptare. Kjo lëvizje e re politike do të garojë në zgjedhjet e 2025 dhe më  28 nëntor u organizua një festë për prezantimin e saj.

Në programin “Rudina” në Tv Klan, Elena Kocaqi shpjegon si lindi ideja për të krijuar një parti politike, e cila ka qenë një synim i saj prej kohësh por ka marrë kohë për përgatitjen personale.

Elena Kocaqi: Unë kam mbi 10 vjet që e mendoj këtë gjë dhe kur kam mbaruar fakultetin e parë, Histori, pastaj Juridikun, kam mbaruar një fakultet të tretë për Shkenca Politike dhe e kam mbaruar qëllimisht që nëse një ditë do të futem në politikë, do të kem unë si individ një informacion shumë të madh me qëllim që t’i shërbej vendit tim sepse tekefundit unë politikën nuk e shikoj siç është në Shqipëri, e shikoj si një përgjegjësi të jashtëzakonshme që ti merr përballë popullit tënd dhe duke mbajtur një përgjegjësi të tillë, kam menduar se duhet patjetër të jesh shumë e përgatitur vetë duke qenë se nesër hyrja në politikë siç është edhe fakti që aktualisht jemi duke u aktivizuar, unë të jap maksimumin tim si Elena.Kocaqi e cilëson si “ndërmarrjen më të vështirë të jetës” dhe për të, themeli i gjithë kësaj është dhënia e një kontributi të vlefshëm për vendin.

Elena Kocaqi: Kjo është ndërmarrja më e vështirë e gjithë jetës sime. Nëse për gjithë të tjerat unë jam menduar dhe kam marrë vendime shumë të shpejta, kjo është ndërmarrja ime më e vështirë. Unë e konsideroj sakrificë. Për mua është sakrificë sepse unë e kam karrierën time akademike, ndihem shumë e lumtur në ato gjëra që unë bëj dhe duhet të privohem nga lumturia ime në njëfarë mënyre me qëllim që unë të jap kontribut që edhe kjo është njëfarë lumturie se ti mendon që ta bësh për vendin tënd këtë dhe mendoj se është një moment që meqë politika nuk të dëgjon, edhe kur e këshillon nuk t’i pranon këshillat etj dhe meqë ne jemi të fushës, atëherë pse mos të kontribuojmë për vendin tonë?/ Tv Klan