Nikollovski: Po zhvillohen negociata për të futur një linjë të re ajrore nga Budapesti në Ohër

Ministria e Transportit është në negociata me kompaninë “Wizz Air” për të krijuar një linjë ajrore nga Budapesti në Ohër. Sipas ministrit Aleksandar Nikolloski, kjo linjë do të ishte më tërheqëse sepse, siç thotë ai, potenciali turistik është shumë më i madh, transmeton Portalb.mk.

Lidhur me itinerarin nga Budapesti në Shkup, i cili është anuluar, Nikolloski thotë se nuk ishte tërheqës komercialisht sepse ka dy destinacione më të afërta për të cilat janë të disponueshme fluturimet, përkatësisht Vjena dhe Bratislava.

“Budapest – Shkup ishte linja e vetme për të cilën ‘Wizz Air’ mori subvencione, subvencionet përfunduan, për fat të keq, numri i pasagjerëve është i vogël dhe për këtë arsye ajo linjë u anulua. Nuk ka aq shumë pasagjerë nga Maqedonia që të shërbehen brenda një rrezeje dy-orëshe në tre aeroporte”, thotë Nikolloski.

Ai shton se Ministria po punon mbi një model për të tërhequr linja ajrore të reja dhe beson se kjo do të mundësojë të paktën dhjetë, dhe potencialisht njëzet, destinacione të reja.

Nikolloski thotë se modeli aktual i subvencionimit të pasagjerëve që vijnë po jep rezultate dhe se brenda pak muajsh do të ketë dhjetë linja të reja. Me modelin e ri, thotë ai, është planifikuar të rriten subvencionet.

“Po punoj për një model të ri me njerëzit nga Ministria, nuk dua të premtoj, por mendoj se do të sjellë të paktën dhjetë, dhe potencialisht deri në njëzet destinacione të reja në një periudhë të shkurtër kohore. Modeli është që duam të rrisim subvencionet. Aktualisht, ne paguajmë 9 euro për pasagjer që mbërrin për dikë që do të zbarkojë në Shkup dhe 12 euro për dikë që do të zbarkojë në Ohër. Jemi të gatshëm të rritemi me kusht që kompania të hapë të paktën 10 destinacione në të njëjtën kohë, por le ta përfundojmë dhe pastaj do të flasim për këtë”, shtoi Nikolloski.

Ai thotë se fluturimet çarter të Freebird Airlines japin  kontribut të fortë në rritjen e trafikut ajror, dhe kështu drejtpërdrejt në turizëm, sepse, siç tha ai, të paktën 180 turistë zbarkojnë në Aeroportin e Shkupit çdo ditë. Planet, sipas Nikolloskit, janë që të ketë të paktën dy fluturime çarter në ditë në Aeroportin e Ohrit.

“Ambicia është që vitin e ardhshëm të paktën dy aeroplanë të ulen në Ohër, që do të thotë se do të kemi 200 turistë të rinj çdo ditë. Ata qëndrojnë për të paktën katër ditë, që do të thotë se ke 800 turistë në bregdetin e Ohrit në muaj jo tërheqës, duke mbushur hotelet, restorantet dhe pazarin”, tha ai.

Nikolloski shton se një kontribut të madh jep edhe kompania “Turkish Airlines”, e cila fluturon nga aeroporti më i madh në Evropë drejt Ohrit.

Ekzistojnë lidhje ajrore nga vendi me 64 destinacione, nga të cilat 56 janë nga Aeroporti i Shkupit dhe 8 nga Aeroporti i Ohrit.

Duke filluar nga e shtuna, Aeroporti i Shkupit do të ofrojë fluturime dy herë në javë për në Barcelonë dhe tre herë në javë për në Lion.

Në janar të këtij viti, Ministria e Transportit njoftoi se po futeshin dy linja të reja ajrore për në Paris dhe Gjenevë, të cilat do të operohen nga linja ajrore “EasyJet”. Fluturimi për në Paris, për në Aeroportin Orly, filloi të operojë më 2 prill, ndërsa linja për në Gjenevë do të fillojë të funksionojë më 3 nëntor të këtij viti.