Osmani: Po zbehen projektet kyçe rrugore – goditet lidhja me Kosovën dhe Shqipërinë

Bujar Osmani nga Bashkimi Demokratik për Integrim ka reaguar ndaj zhvillimeve të fundit në sektorin e infrastrukturës, duke ngritur shqetësime për ndryshime të mundshme në projekte strategjike rrugore.

Sipas Osmanit, Ministria e Transportit dhe Lidhjeve ka kërkuar analizë zyrtare për uljen e projektit të autostradës Shkup–Bllacë në nivel rruge ekspres, ndërsa tenderi ekzistues për autostradë vazhdon të mbetet pezull.

“Ministria e Transportit ka kërkuar analizë zyrtare për ta ulur projektin e autostradës Shkup–Bllacë në rrugë ekspres, ndërkohë që tenderi ekzistues për autostradë mbahet pezull,” deklaroi Osmani.

Ai shtoi se paralelisht po ndodh edhe një tjetër zhvillim i rëndësishëm, që lidhet me ndërprerjen e një projekti tjetër ndërkufitar.

“Paralelisht, po anulohet zyrtarisht lidhja Strugë–Qafë Thanë me Shqipërinë,” theksoi ai.

Sipas Osmanit, këto vendime nuk janë të rastësishme, por pjesë e një qasjeje më të gjerë politike.

“Këto dy vendime në dy pika kyçe nuk janë rastësi. Janë veprime të qëllimshme dhe të hapura për shkëputjen e vendit nga Kosova dhe Shqipëria,” u shpreh ai.

Ai e lidhi këtë situatë me ndikime politike rajonale, duke përmendur edhe rolin e subjekteve të tjera politike në vend.

“Në përputhje me logjikën e politikave të ‘botës serbe’, me VLEN-in në rolin e instrumentit të tyre politik,” deklaroi Osmani.

Reagimi i tij vjen në kohën kur debatet për prioritetet infrastrukturore dhe orientimin strategjik të vendit po intensifikohen. Gazeta Flaka

The post Osmani: Po zbehen projektet kyçe rrugore – goditet lidhja me Kosovën dhe Shqipërinë appeared first on Flaka, në çdo lajm... .