Sefer Selimi: Kryeministër, hiqe shqipen dhe zgjidhe problemin!

Analisti politik Sefer Selimi ka reaguar ashpër ndaj deklaratave të fundit të kryeministrit Hristijan Mickoski lidhur me çështjen e studentëve dhe përdorimin e gjuhës shqipe, duke akuzuar për tendencë të qartë për shfuqizimin e Ligjit për përdorimin e gjuhëve.

Selimi thekson se deklaratat e Mickoskit dëshmojnë, sipas tij, se Gjykata Kushtetuese e Maqedonisë së Veriut dhe institucione të tjera të pavarura janë vënë në funksion të agjendës partiake të pushtetit. Ai përmend gjithashtu prokurorinë, gjykatat, Avokatin e Popullit, Presidencën dhe Bankën Popullore si pjesë e këtij ndikimi të pretenduar.

“‘Zgjidhja kreative’ që premton kryeministri është në fakt një rrugë drejt shfuqizimit të pjesshëm të Ligjit për përdorimin e gjuhëve, përmes Gjykatës Kushtetuese,” deklaron Selimi, duke aluduar në rolin e kryetarit të kësaj gjykate, Darko Kostadinovski.

Ai shton se përfshirja e ekspertëve të afërt me pushtetin, përfshirë këshilltaren për të drejtat e njeriut Tanja Karakamisheva, ngre dyshime për paanshmërinë e procesit.

Sipas Selimit, mesazhi që po dërgohet është i qartë: “Drejtësia nuk mund të kërkohet e të jepet në shqip”, duke ironizuar arsyetimet që, sipas tij, përdoren për të kufizuar përdorimin e gjuhës shqipe në institucione.

Në fund, ai vlerëson se kjo qasje është vazhdimësi e një strategjie të paralajmëruar më herët nga Mickoski, ndërsa ngre pyetjen kyçe për reagimin e faktorit politik dhe shoqëror shqiptar ndaj këtyre zhvillimeve.

The post Sefer Selimi: Kryeministër, hiqe shqipen dhe zgjidhe problemin! appeared first on Flaka, në çdo lajm... .