Senati amerikan do të votojë për kufizimin e kompetencave të luftës së Trumpit

Ligjvënësit amerikanë do të përpiqen javën e ardhshme të miratojnë sërish një rezolutë për ndalimin e luftës me Iranin dhe të detyrojnë presidentin Donald Trump që të marrë miratimin e Kongresit për çdo sulm të mëtejshëm, deklaroi të mërkurën lideri i demokratëve në Senat, Chuck Schumer, menjëherë pasi Trump shpalli një armëpushim dyjavor.

“Kongresi duhet të riafirmojë autoritetin e tij, veçanërisht në këtë moment të rrezikshëm”, tha Schumer në një konferencë për shtyp në zyrën e tij në Nju Jork.

Demokratët në Senat dhe në Dhomën e Përfaqësuesve gjatë muajve të fundit janë përpjekur, por kanë dështuar vazhdimisht të miratojnë rezoluta për kompetencat e luftës, të cilat do ta detyronin Trumpin të marrë miratimin e ligjvënësve përpara nisjes së operacioneve ushtarake.

Republikanët e Trumpit në Kongres — që mbajnë një shumicë të ngushtë në të dyja dhomat — pothuajse njëzëri kanë mbështetur politikën e tij.

Megjithëse Kushtetuta e SHBA-së përcakton që Kongresi, dhe jo presidenti, shpall luftën, ky kufizim nuk zbatohet për operacione afatshkurtra ose në situata kur vendi përballet me një kërcënim të menjëhershëm.

Lideri i demokratëve në Dhomën e Përfaqësuesve, Hakeem Jeffries, tha se edhe ajo dhomë duhet të votojë për rezolutën për frenimin e luftës kundër Iranit.

“Na duhet një fund i qëndrueshëm i kësaj lufte të pamenduar që Donald Trump e ka zgjedhur vetë”, tha Jeffries për CNN./INA/

The post Senati amerikan do të votojë për kufizimin e kompetencave të luftës së Trumpit appeared first on InfoShqip.com.