Sulmet e Izraelit në Liban, Irani paralajmëron bllokimin e Ngushticës së Hormuzit

Autoritetet iraniane kanë paralajmëruar mbylljen e Ngushticës së Hormuzit, duke kërcënuar se do të shkatërrojnë çdo anije që përpiqet të kalojë, pas sulmeve të Izraelit në Liban.

Sipas mesazhit të publikuar nga mediat e huaja, që i atribuohet një stacioni detar të Gardës Revolucionare iraniane, Ngushtica e Hormuzit konsiderohet e mbyllur dhe çdo anije duhet të marrë leje paraprake për kalim tranzit.

“Vëmendje, të gjitha anijet në Gjirin Persik dhe Detin e Omanit. Ky është Stacioni Detar i Gardës Revolucionare. Ngushtica e Hormuzit mbetet e mbyllur dhe kërkohet leja nga Garda para kalimit tranzit. Çdo anije që përpiqet të hyjë në det do të shënjestrohet dhe do të shkatërrohet”, thuhej në mesazh.

Ngushtica e Hormuzit është një pikë kyçe për transportin global të naftës dhe gazit, dhe çdo ndërprerje e qarkullimit në këtë zonë mund të ketë pasoja të mëdha për tregjet ndërkombëtare dhe ekonominë globale.

Ende nuk ka një reagim zyrtar nga komuniteti ndërkombëtar lidhur me këtë paralajmërim, ndërsa situata në rajon mbetet e tensionuar.