U organizua marshi i bjeshkatarëve “Bllaca ‘99” në përkujtim të eksodit të shqiptarëve (FOTO)
Në përkujtim të eksodit të shqiptarëve të Kosovës në vitin 1999-të, Unioni i Shoqatave Bjeshkatare Shqiptare të Maqedonisë së Veriut së bashku me Institutin e Krimeve të Kryera gjatë Luftës në Kosovë (IKKL) sot kanë organizuar “Marshin e Paqes Bllaca ’99”, transmeton Portalb.mk.
Bjeshkatarët e Maqedonisë së Veriut të organizuar me autobusë u nisën në ora 07:30 nga Shkupi për në Kaçanik. Së bashku me bjeshkatarët tjerë, prej aty e nisën marshin nëpër shtegun malor, për të përkujtuar rrugët e refugjatëve shqiptar mes Kaçanikut dhe Hanit të Elezit, për të vazhduar deri te Qendra Memoriale “Bllaca ‘99”, vend ku ishin vendosur qindra mijëra refugjatë në prillin e vitit 1999.
Marshuesit e udhëhequr nga kryetari i Unionit, Fari Rexhepi, u pritën në Qendrën Memoriale nga Kryetari i Komunës së Hanit të Elezit, Mehmet Ballazhi.
Sherife Luta, ikona e gruas shqiptares ne kampin e refugjatëve në Bllacë. Foto nga Portalb.mk
Marshi në përkujtim të refugjatëve Bllaca 99. Foto nga Portalb.mk
Unioni theksoi që përmes këtij marshi do të përkujtohet kjo ngjarje historike dhe do të respektohen viktimat e eksodit.
Përfundimi i agjendës u shënua në hapësirat e Shtëpisë së Kulturës “Imri Elezi”, ku u shpërndanë mirënjohje për shoqatat e bjeshkatarëve.
