Akuza për hetimet për tragjedinë në Koçan, kryefjala e seancës parlamentare kushtuar pyetjeve të deputetëve
Gjatë seancës parlamentare kushtuar pyetjeve të deputetëve të RMV-së, çështje qendrore ishte hetimi lidhur me zjarrin që përfshiu diskotekën PULSE në Koçan ku humbën jetën 59 persona. Nga radhët e LSDM-së u drejtua kërkesë për sqarime nga ministri i Punëve të Brendshme, Pançe Toshkovski se përse në hetimet nuk janë përfshirë zyrtarë aktualë të Ministrisë […]


Gjatë seancës parlamentare kushtuar pyetjeve të deputetëve të RMV-së, çështje qendrore ishte hetimi lidhur me zjarrin që përfshiu diskotekën PULSE në Koçan ku humbën jetën 59 persona. Nga radhët e LSDM-së u drejtua kërkesë për sqarime nga ministri i Punëve të Brendshme, Pançe Toshkovski se përse në hetimet nuk janë përfshirë zyrtarë aktualë të Ministrisë së Punëve të Brendshme, të cilët, sipas tyre, nuk ndërmorën veprime për të penguar grumbullimet në lokalin e natës, ku në mbrëmjen tragjike ishin mbledhur rreth 650 persona. Sipas deputetit Mile Talevski, MPB po mbron persona të lidhur ngushtë me VMRO-DPMNE-në, shkruan Portalb.mk.
“Ja ku e keni fotografinë, ajo shpjegon gjithçka! Tomo Donev, shef i policisë kriminale të Koçanit, i pranishëm në aktivitete partiake të VMRO-DPMNE-së në Koçan. Kjo ndodh pavarësisht faktit që e dimë se në bazë të ligjit për punë të brendshme, nëpunësit policorë nuk lejohen të marrin pjesë në ngjarje politike dhe nuk mund të jenë pjesëtarë të partive politike”, deklaroi Mile Talevski nga LSDM.
Ministri i Punëve të Brendshme, Pançe Toshkovski, replikoi duke thënë se për tragjedinë është në proces procedura hetimore që përfshin 34 persona, mes tyre edhe anëtarë të VMRO-së, LSDM-së dhe BDI-së. Ai i kujtoi LSDM-së se në tragjeditë e mëparshme, MPB nuk kishte paraqitur asnjë padi penale.
“Opinioni i Maqedonisë duhet të jetë në dijeni se për rastin e Llaskarcës nuk pati asnjë kallëzim penal të ngritur, zero persona të proceduar në kuadër të procedurës nga ana e MPB-së. Fakt i padiskutueshëm! Ja ku është raporti, fakt i pakontestueshëm. Për BESA TRANS, rastin që ndodhi në Bullgari, zero kallëzime penale! Qeveria juaj! Ministria juaj e Punëve të Brendshme! Zero persona të akuzuar, respektivisht më falni, të dyshuar nga ana e Ministrisë së Punëve të Brendshme. Edhe për spitalin modular, përsëri zero persona. Zero, zero!”, tha Pançe Toshkovski, Ministër i Brendshëm.
Edhe nga BDI akuzojnë se MPB nuk ka vepruar në mënyrë korrekte kur ka ngritur kallëzimet penale. Deputeti i kësaj partie, Blerim Bexheti, shprehet se ndërkohë që i gjithë zinxhiri i institucioneve ka dështuar në përmbushjen e detyrave të veta, Qeveria po fokusohet vetëm te zyrtarë të qeverisë së kaluar. Njëlloj si LSDM, edhe BDI, për arsye morale kërkojnë dorëheqjen e ministrit Toshkovski.
Në zjarrin që ndodhi më 16 mars në diskotekën “Pulse” në Koçan, kanë humbur jetën 59 persona, ndërsa kishte 196 të lënduar që u trajtuan brenda dhe jashtë vendit.
Sipas hetimeve të deritanishme nga institucionet, diskoteka ka punuar me një sërë shkeljesh të mëdha: nuk kishte rrjet hidranti dhe mjaftueshëm aparate PP, përdoreshin materiale piroteknike në mënyrë të paligjshme, nuk kishte as leje pune të ligjshme dhe nuk ishte lidhur asnjë kontratë me shkrim mes organizatorit dhe grupit interpretues.
Prokuroria në Koçan dhe Prokuroria për Ndjekjen e Krimit të Organizuar dhe Korrupsionit kanë identifikuar si të dyshuar gjithsej 34 persona dhe tre kompani për krime të rënda kundër sigurisë publike. Ndërkaq, Ministria e Punëve të Brendshme ka ngritur kallëzime penale kundër tyre, në mesin e tyre ka ish-funksionarë shtetërorë. Në paraburgim janë 24 persona.