Beogradi: Kemi eliminuar Korridorin 8, po ndërtojmë linjën Beograd–Shkup–Athinë

Ministri serb i Ndërtimit, Transportit dhe Infrastrukturës, Goran Vesić, ka deklaruar hapur se vendimi i regjimit të Aleksandar Vučić ka ndikuar në ndalimin e zhvillimit të Korridorit 8 – projekt strategjik që synonte lidhjen e Detit të Zi me Adriatikun, shkruan Gazeta Flaka

“Bashkimi Evropian imponoi korridorin nga Bullgaria në Shqipëri, si dhe atë nga Rumania në Greqi. Ne e kemi parandaluar këtë skenar të errët për Serbinë me vendimin e Aleksandar Vuçiçit për të filluar investimet në linjën hekurudhore të Korridorit 10,” deklaroi Vesiç.

Ai shtoi se “Serbia duhet të luftojë për të qenë vend qendror përmes të cilit kalojnë të gjitha linjat hekurudhore”.

Sipas raportimit të BGNES, këto deklarata përbëjnë një pranim të drejtpërdrejtë të përfshirjes së Beogradit në frenimin e Korridorit 8, një projekt me rëndësi të madhe gjeostrategjike për rajonin.

Korrespondenti i BGNES nga Shkupi rikujton se një nga vendimet e para të qeverisë së kryeministrit Hristijan Mickoski ishte ndalimi i punimeve për Korridorin 8. Ndërkohë, zëvendësi i tij, Aleksandar Nikoloski, kishte tentuar të ridrejtonte fondet evropiane të siguruara për këtë korridor drejt Korridorit 10.

Korridori 8 konsiderohet një nga projektet kyçe për lidhjen lindje–perëndim në Ballkan, ndërsa orientimi drejt Korridorit 10 shihet si forcim i boshtit veri–jug me qendër në Serbi. Burimi: BGNES – Gazeta Flaka

The post Beogradi: Kemi eliminuar Korridorin 8, po ndërtojmë linjën Beograd–Shkup–Athinë appeared first on Flaka, në çdo lajm... .