Blerim Sejdiu: Të papranueshme tentativat për minimizim të VLEN-it

Nënkryetari i Lëvizjes BESA, Blerim Sejdiu, ka reaguar ndaj përpjekjeve për të minimizuar rolin e VLEN-it në Qeveri, duke theksuar se ky subjekt është një faktor kyç dhe ka ndikim të drejtpërdrejtë në vendimmarrje.

“Çdo tentativë për të zvogëluar rëndësinë e VLEN-it në Qeveri është e papranueshme dhe e destinuar të dështojë. Sipas tij, përfaqësuesit e VLEN-it mbajnë poste kyçe dhe janë pjesë thelbësore e proceseve qeveritare, ka shkruar ai në Facebook.

Në lidhje me çështjet e koordinimit brenda VLEN-it, ai tha se çdo përmirësim duhet të bëhet brenda strukturave të subjektit dhe jo përmes deklaratave publike që dëmtojnë unitetin e përbashkët. “Nuk është momenti për lojëra politike individuale,” tha Sejdiu.
Gjithashtu ka kritikuar edhe funksionarët që kanë dhënë dorëheqje ose kanë bërë deklarata të tipit “e provuam, por nuk ia dolëm”. Sipas tij, këto janë çështje të paaftësisë personale dhe nuk përfaqësojnë qëndrimin e VLEN-it. “VLEN nuk mund të mbajë përgjegjësi për dështimet e individëve,” u shpreh ai.

Sa I përket deklaratave të fundit të Arben Taravarit, Sejdiu tha se përgjegjësia është e tij dhe e bashkëpunëtorëve të tij. “Nëse Taravari pretendon se VLEN nuk ka fuqi, atëherë pse funksionarët e tij pranuan poste? Ky është një qëndrim kontradiktor që duhet të sqarohet nga ata vetë,” theksoi Sejdiu.

Në fund, nënkryetari i Lëvizjes BESA theksoi se funksionarët duhet të sillen me përgjegjësi dhe lojalitet ndaj misionit të VLEN-it. “Nëse nuk janë të kënaqur, kanë të drejtën të largohen, por nuk kanë të drejtë të dëmtojnë strukturën që u dha mundësinë të kontribuojnë,” , thotë Sejdiu.

Ai përfundoi duke theksuar se VLEN është një forcë e organizuar dhe efektive, e cila nuk do të lejojë që individë të pakënaqur të dëmtojnë imazhin e saj për interesa personale.

The post Blerim Sejdiu: Të papranueshme tentativat për minimizim të VLEN-it appeared first on InfoShqip.com.