Kryeminisri Rama premtim për mësuesit: Pagën mesatare të arsimtarëve do ta bëjmë 1250 euro!

Kryeministri Edi Rama ka zhvilluar pasditen e sotme një takim në shkollën “Besnik Sykja” në Tiranë.

Në fjalën e tij, Rama u ndal ndër të tjera edhe te vështirësia psikologjike që kanë mësuesit e shkollave në lidhje me nxënësit.

Kreu i qeverisë premtoi se brenda kësaj dekade paga mesatare për mësuesit do të jetë 1250 euro.

Pjesë nga fjala e Ramës:

Vështirësia në punën e mësuesve nuk shkon duke u ulur, por duke u rritur. Nuk është një vështirësi fizike, por është një vështirësi pune psikologjike. Plani ynë është që në vitet e ardhshme, brenda kësaj dekade ne pagën mesatare të mësuesve do ta çojmë 1250 euro. Është e bëshme, nuk besoj se do të kemi problem me këtë, ndërkohë që siç foli kryetarja në detyrë e bashkisë, siç foli ministrja, pjesa tjetër e përmirësimit të kushteve në shkolla shkon në favor të rritjes së dëshirës për të shkuar në punë.