Familjarët e viktimave dhe Iniciativa Zero kërkojnë nga Kocevski të rihapet hetimi për zjarrin në spitalin modular: Të dënohen fajtorët e vërtetë
Familjarët e viktimave të zjarrit tragjik në spitalin modular të Tetovës, iu bashkëngjitën letrës së hapur të dërguar nga Iniciativa ZERO, drejtuar Prokurorit Publik të Republikës së Maqedonisë së Veriut, Ljupço Kocevski, transmeton Portalb.mk. Mumin Ismaili i cili e humbi nënën në zjarrin tragjik tha se e gjithë opinioni publik e di se ekzistojnë prova […]
Familjarët e viktimave të zjarrit tragjik në spitalin modular të Tetovës, iu bashkëngjitën letrës së hapur të dërguar nga Iniciativa ZERO, drejtuar Prokurorit Publik të Republikës së Maqedonisë së Veriut, Ljupço Kocevski, transmeton Portalb.mk.
Mumin Ismaili i cili e humbi nënën në zjarrin tragjik tha se e gjithë opinioni publik e di se ekzistojnë prova serioze për lëshime gjatë ndërtimit të spitalit modular, të cilat mund të jenë arsyet e vetme për shpërthimin e zjarrit.
“Kjo u konfirmua edhe nga ekspertiza gjermane – një dëshmi e pavarur dhe e besueshme, e cila, për fat të keq, u refuzua nga prokuroria. Prandaj, i nderuar Ljupço, si Tetovar, ju më së miri e kuptoni dhimbjen dhe zemërimin e familjeve të viktimave dhe të gjithë komunitetit. Kjo nuk është vetëm një çështje ligjore. Kjo është një detyrim moral – ndaj atyre që i humbëm, por edhe ndaj të gjithë qytetarëve që sot jetojnë me frikën se një tragjedi e tillë mund të përsëritet, ndërsa askush nuk do të mbahet përgjegjës”, tha Ismaili.
Ai shtoi se është koha që dikush të marrë përgjegjësi dhe që drejtësia të dalë nga sirtari.
Familjarët e viktimave dhe iniciativa Zero kërkuan nga prokurori:
- Të rihapet hetimi për të gjetur fajtorët e vërtetë të zjarrit në spitalin modular në Tetovë.
- Të formohet një ekip të pavarur që do të shqyrtojë të gjitha aspektet e rastit, përfshirë edhe zvarritjet eventuale të procedurës nga prokuroret.
- Të garantohet se procedura gjyqësore do të zhvillohet pa ndikime partiake apo të biznesit.
- Të sigurohet transparencë dhe përgjegjësi në punën e tyre, në përputhje me obligimet ligjore.
- Ekspertiza gjermane te jete si provë kyçe në këtë hetim.
“Ne nuk do të heshtim. Do të vazhdojmë të flasim – për të dashurit tanë që i humbëm, për të vërtetën, për drejtësinë që na është premtuar, por asnjëherë nuk është realizuar. Ju faleminderit”, tha Ismaili.
Javën e kaluar në Tetovë u mbajt protestë për shkak të mos sjelljes së drejtësisë për këtë rast.
Ky reagim erdhi sot pak minuta para se të fillojë seanca e rigjykimit për zjarrin në spitalin modular, e cila po zhvillohet në Gjykatën e Tetovës.
Në këtë rast akuzohen ish drejtori mjekësor i spitalit Florin Besimi, ish drejtori Ekonomik Artan Etemi dhe Spitali i Tetovës si person juridik.
Besimi dhe Etemi, akuzohen për veprën penale “Krime të rënda kundër sigurisë publike”, ndërsa ISHP Spitali Klinik i Tetovës për veprën penale “shkaktim i rrezikut të përgjithshëm”.
Rasti rigjykohet pasi Gjykata e Apelit të Gostivarit e ka kthyer lëndën në Gjykatën Themelore në Tetovë.
Megjithatë, të akuzuarit nuk akuzohen për shkaqet e zjarrit por për vepra tjera penale.
Me 8 shtator 2021 në spitalin modular të Tetovës ku trajtoheshin pacientët me Kovid-19 ra një Zjarri i tmerrshëm dhe që mori me vete 14 jetë të pacientëve, por edhe të anëtarëve të familjeve që ndodheshin brenda. 14 persona u shpëtuan përpara se objekti të digjej plotësisht.
