Shoqata e diabetikëve kërkon nga Ministria e Shëndetësisë menjëherë të merr masa për shpërndarjen e insulinës nëpër farmacitë e RMV

Shoqata e të sëmurëve nga diabeti në Maqedoninë e Veriut sot ka dërguar një letër publike përmes së cilës ka shprehur shqetësimin për mungesën e insulinës dhe terapisë kundër diabetit. Ata apelojnë deri te Ministria e Shëndetësisë dhe Qeveria që të marrin masa dhe të fillojnë menjëherë me shpërndarjen e të gjitha barnave të insulinës nëpër farmaci, sipas nevojave dhe numrit të pacientëve ekzistues, transmeton Portalb.mk.

“I bëjmë thirrje barnatoreve të insulinës që të mos ofrojnë zëvendësim të terapisë, e cila duhet të jetë ekskluzivisht e përshkruar nga endokrinologu. I bëjmë thirrje anëtarëve tanë të ndihmojmë njëri-tjetrin me huazime të terapisë që mungon, pa pranuar ndryshime administrative në barnatore”, thanë nga Shoqata e Diabetikëve në Maqedoni.

Ata i bëjnë thirrje të gjitha palëve të prekura të gjejnë një mënyrë për shpërndarjen e terapisë së nevojshme pa asnjë zgjidhje administrative ose, më saktë, pa zgjidhje që do të dëmtonin kontrollin e sheqerit dhe, në këtë mënyrë, edhe shëndetin e tyre.

“I bëjmë thirrje të gjithëve të mos e harxhojnë durimin dhe mirëkuptimin tonë për këtë situatë, për të cilën jemi të vetëdijshëm se mund të shmanget nëse të gjitha proceset e tenderit fillojnë në kohë, pa asnjë vonesë apo justifikim”, shtuan nga Shoqata e Diabetikëve në Maqedoni.