Komuna e Gostivarit e zhytur në borxhe, rrezikohet funksionimi i saj

Gostivari është komuna me borxhin më të lartë në nivel shteti. Qytetarët thonë se pavarësisht e është premtuar shumë, ndër vite nuk është zvogëluar borxhi. Sipas tyre kjo ka ardhur si pasojë e keq menaxhimit me administratën komunale Ekspertët thonë se në këtë rast ka dyshime për keqpërdorime dhe duhet të hetohen.

“E zhytur në borxhe deri në fyt, komuna e Gostivarit rrezikon funksionimin normal në vitet e ardhshme dhe dhënien e shërbimeve ndaj qytetarëve. Çdo banor i kësaj komune, rezulton me rreth 350 euro borxh, ndërsa fëmijët moshës nga zëro deri në 17 vjeç, do jenë me rreth 150 euro borxh. Banorët ankohen se me akumulimin e gjithë këtij borxhi, duhej të paktën të ishin përmirësuar shërbimet ndaj tyre”, raporton Bashkim Sulejmani, Gazetar.

“Të jetë normale kjo s’është aspak. Unë nuk i kuptoj këto punë si janë, nuk jam i njoftuar, por asgjë s`ka përmirësuar, gjithçka njëjtë është siç ka qenë ashtu është. As pastërti as shërbime asgjë. Unë jetoj tej ndërtesat rreth lumit, katastrofë është shihni kontejnerët ku jetoj si janë”, tha një banor.

“Shumë pak janë përmirësuar gjërat, se di në të ardhmen si do jetë. Lavdërohen shumë tregohen shumë që do bëjnë diçka por kot, nuk besoj. Shumë pak kanë përmirësuar, por jo sa duhet dhe sa lavdërohen dhe thonë që punojnë”, u shpreh një tjetër banor.

“Po kur ka pasur më pak borxh komuna jonë. Gjithnjë ka qenë kështu, secili që ka ardhur ka pas borxhe. Më shumë flasin se sa punojnë. Këtu diçka lëvizet tek ne”, theksoi një banor i Gostivarit.

Juristët paralajmërojnë se keqpërdorimi i financave publike dhe shpërdorimi me detyrën zyrtare janë dy vepra për të cilat patjetër duhet të ketë përgjegjësi.

“Këto dy vepra penale që përmendëm janë të ndërlidhura mes vete dhe prokuroria nëse bën një procedim për abuzim me financa publike, me automatizëm në të njëjtën akt akuzë duhet të jetë edhe akuza e shpërdorimit të detyrës, sepse janë të ndërlidhura njëra me tjetrën”, deklaroi Sejfulla Osmani, jurist.

Në nivel të shtetit, komuna e Gostivarit është lider me zhytjen në borxhe, edhe atë në vlerë prej 11.2 milion euro. /Alsat.mk