KSHPK-ja identifikoi rreziqet rregullatore në Ligjin për qasje të lirë në informacionet publike
Komisioni Shtetëror për Parandalimin e Korrupsionit (KSHPK) ka identifikuar rreziqe rregullatore në Ligjin për qasje të lirë në informacionet me karakter publik. KSHPK rekomandon rishikimin e nenit që rregullon detyrimin për publikimin e të gjithë dokumentacionit të prokurimit publik në përputhje me Ligjin e Prokurimit Publik, i cili parashikon publikimin e dokumenteve përkatëse, si dhe […]
Komisioni Shtetëror për Parandalimin e Korrupsionit (KSHPK) ka identifikuar rreziqe rregullatore në Ligjin për qasje të lirë në informacionet me karakter publik. KSHPK rekomandon rishikimin e nenit që rregullon detyrimin për publikimin e të gjithë dokumentacionit të prokurimit publik në përputhje me Ligjin e Prokurimit Publik, i cili parashikon publikimin e dokumenteve përkatëse, si dhe saktësimin e mëtejshëm të procedurës për përcaktimin e përfundimit të funksionit të drejtorit të Agjencisë për mbrojtjen e të drejtës për qasje të Lirë në Informacionet Publike dhe zëvendësit të tij, transmeton Portalb.mk.
Siç theksoi anëtarja e KSHPK-së, Sofija Spasova, e cila në seancën e sotme shpjegoi Raportin për Shqyrtimin e Ligjit kundër Korrupsionit, përgjegjësia kundërvajtëse ndërmjet menaxhmentit dhe zyrtarit për informim në Agjenci duhet të përkufizohet qartë, në përputhje me përgjegjësitë e tyre aktuale.
“KSHPK-ja beson se termi “dokumentacion i plotë” në lidhje me prokurimin publik nuk është përcaktuar saktë, gjë që mund të rezultojë në publikimin e informacionit konfidencial dhe shkeljen e të drejtave të palëve të treta. Lidhur me përfundimin e detyrës dhe shkarkimin e Drejtorit të Agjencisë për Mbrojtjen e të Drejtës për Qasje të Lirë në Informacionet Publike dhe zëvendësit të tij, paragrafi 1 parashikon shkaqet e përfundimit të detyrës para skadimit të mandatit, dhe sipas paragrafit 2, Kuvendi i RMV-së përcakton përfundimin e detyrës në rastet e parashikuara në paragrafin 1. Megjithatë, nuk është përcaktuar asnjë afat apo procedurë, e cila mundëson zvarritje të mundshme, selektivitet dhe pasiguri në menaxhimin e institucionit. Për dispozitat kundërvajtëse, KSHPK-ja ka përcaktuar ekzistimin e përgjegjësisë joproporcionale. Vetëm 500 euro gjobë është paraparë për menaxherin nëse nuk cakton një zyrtar për të ndërmjetësuar me informacione dhe nuk i jep publikut informacione për atë person, por gjobë prej 250 euro është paraparë edhe për zyrtarin për kundërvajtje të shumta – përditësimi i listës së informacionit, ndihma e aplikantëve, respektimi i afateve për përgjigje ndaj kërkesave”, theksoi Spasova.
Ajo gjithashtu iu drejtua mbajtësve të informacionit ku janë identifikuar edhe rreziqe rregullatore.
“Është detyrim i poseduesve të informacionit që të përditësojnë rregullisht listën e informacionit që disponojnë dhe ta publikojnë atë publikisht, por kjo dispozitë nuk ka kritere të sakta se çfarë informacioni duhet të publikohet, as në çfarë mënyre dhe në çfarë formati, gjë që u lë poseduesve të informacionit diskrecion të gjerë për të vendosur se çfarë të publikojnë dhe si. Ky është rrezik i transparencës së kufizuar me mundësinë e publikimit selektiv apo fshehjes së informatave me interes publik”, nënvizoi Spasova.
Derisa KSHPK-ja ishte duke përgatitur raportin, në ENER është publikuar Projektligji për ndryshimin e Ligjit për Qasje të Lirë në Informata Publike. Verifikim antikorruptiv i tekstit nuk është kërkuar, tha Spasova, për këtë arsye, tha ajo, nëse amendamentet miratohen, ato do të shqyrtohen në mënyrë shtesë.
Komisioni Shtetëror për Parandalimin e Korrupsionit sot në seancë diskuton edhe Raportin për shqyrtimin e kryer antikorrupsion të legjislacionit të dispozitave që kanë të bëjnë me dhënien e licencave, miratimeve, lejeve për funksionimin e objekteve hotelierike dhe të ngjashme, si dhe për mbikëqyrjen në Ligjin për veprimtari hotelierike, Ligjin për mbrojtje dhe shpëtim, Ligjin për mbikëqyrje inspektuese, Ligji për vetëqeverisje lokale, Ligji për mbrojtjen nga lëndët plasëse dhe Ligji për tregtinë me lëndë plasëse.
Në zjarrin që ndodhi më 16 mars në diskotekën “Pulse” në Koçan, jetën e humbën 59 persona, ndërsa më pas dy pacientë ndërruan jetë dy javë pas tragjedisë, duke e çuar numrin total të viktimave në 61. Nga zjarri mbetën 196 të lënduar që u trajtuan brenda dhe jashtë vendit.
Sipas hetimeve të deritanishme nga institucionet, diskoteka ka punuar me një sërë shkeljesh të mëdha: nuk kishte rrjet hidranti dhe mjaftueshëm aparate PP, përdoreshin materiale piroteknike në mënyrë të paligjshme, nuk kishte as leje pune të ligjshme dhe nuk ishte lidhur asnjë kontratë me shkrim mes organizatorit dhe grupit interpretues.
Prokuroria në Koçan dhe Prokuroria për Ndjekjen e Krimit të Organizuar dhe Korrupsionit ka identifikuar si të dyshuar 45 persona fizikë dhe tre persona juridikë për krime të rënda kundër sigurisë publike, njëri prej tyre ka ndërruar jetë si pasojë e plagëve të marra nga zjarri. Ministria e Punëve të Brendshme ka ngritur kallëzime penale kundër tyre, shumica prej të cilëve ndodhen në paraburgim.
