LIDL fillon me fushatën për punësim

Kompania “Lidl” ka nisur një kampanjë punësimi për pozita të lira pune në qendrën e saj logjistike në Kumanovë, si dhe në marketet e saj në mbarë vendin. Me slloganin “Lojë e mirë. Fair play”, kjo kampanjë synon të afrojë mundësitë që ofron “Lidl” si punëdhënës dhe të inkurajojë sa më shumë persona të interesuar që të bëhen pjesë e një ekipi që funksionon mbi parimet e marrëdhënieve korrekte, transparencës dhe respektit.

“Lidl Maqedonia e Veriut” ofron një proces punësimi të qartë dhe të strukturuar, si dhe një trajnim gjithëpërfshirës për të gjithë punonjësit e rinj, thonë nga kompania.

Trajnime 6 deri në 8 javore

Trajnimet zgjasin nga 6 deri në 8 javë dhe janë të dizajnuara për t’u mundësuar kandidatëve fitimin e njohurive praktike dhe aftësive të nevojshme për kryerjen me sukses të detyrave të punës.

Nga kompania thonë se puna në “Lidl” bazohet në vlera si respekti, besimi, performanca e lartë, thjeshtësia dhe bashkimi, dhe se në një mjedis të tillë, çdo punonjës është i rëndësishëm, i vlerësuar dhe i mbështetur, ndërsa puna në ekip është faktor kyç për sukses.

“Me kampanjën ‘Lojë e mirë. Fair play’, dëshirojmë të dërgojmë një mesazh të qartë se në ‘Lidl’ kushdo ka shansin të jetë pjesë e një ekipi që funksionon sipas rregullave të qarta, me marrëdhënie korrekte dhe me respekt ndaj çdo individi. Qëllimi ynë është të ndërtojmë një ekip të fortë, profesional dhe të përkushtuar që do të rritet së bashku me kompaninë. Besojmë se investimi te njerëzit është çelësi i suksesit afatgjatë dhe kjo është arsyeja pse ne krijojmë një mjedis ku zhvillimi dhe progresi janë reale dhe të arritshme,” deklaroi Teodora Haxhi-Dimova Tanaskoska, drejtoreshë e Burimeve Njerëzore në “Lidl Maqedonia e Veriut”.

Standarde ndërkombëtare dhe siguri

Si pjesë e një zinxhiri të madh ndërkombëtar të shitjes me pakicë, kompania operon sipas sistemeve dhe proceseve të krijuara ndër dekada, të cilat tani po aplikohen edhe në tregun maqedonas. Kjo mundëson një mjedis pune të sigurt dhe të qëndrueshëm, si dhe mundësi të qarta për mësim, zhvillim profesional dhe avancim.

Kompania punon në mënyrë transparente dhe në përputhje me të gjitha normat ligjore, duke u ofruar punonjësve siguri dhe stabilitet, por edhe përfitime shtesë që kontribuojnë në një cilësi më të mirë të jetës, duke përfshirë sigurimin shëndetësor privat dhe ekzaminime mjekësore të zgjeruara.

Përveç hapjes së vendeve të reja të punës, “Lidl” po vendos edhe standarde të reja sa i përket kushteve të punës, organizimit dhe kujdesit për punonjësit, duke kontribuar aktivisht në avancimin e tregut të punës.

Më shumë informacione rreth procesit të aplikimit janë të disponueshme në: jobs.lidl.mk/mk/karavan 

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.