LSDM: Kërkojmë dorëheqje nga Toshkovski, banorët në RMV nuk janë të sigurtë

Metodija Ilievski, nënkryetar i LSDM-së, në një konferencë për shtyp të mbajtur sot e akuzoi minsitrin e Punëve të Brendshme, Pançe Toshkovskin, për lëshimet policore të bëra gjatë rastit të Koçanit por jo vetëm. Pas tragjedisë katastrofike në Koçan vazhduan një sërë incidentesh të sigurisë, tha ai, andaj Toshkovski duhet të jep dorëheqje, shkruan Portalb.mk.

“Tragjedia në Koçan nxori në pah të gjitha lëshimet në institucionet por edhe kolapsin e sistemit të sigurisë. Andaj nevojitet përgjegjësi sidomos nga kreu i MPB-së dhe BSP-së. Sistemi i sigurisë tërësisht dështoi. Parandalimi që është nën kompetencat e MPB-së dhe Pançe Toshkovskit, dështoi. Mungojnë kontrolle. Ka vetëm pasoja, të rënda dhe të palejueshme. LSDM kërkon: dorëheqje dhe përgjegjësi nga kryesia e MPB-së në krye me Pançe Toshkovskin”, tha nënkryetari i LSDM-së, Metodija Ilievski.

Sipas tij, të shtënat me armë zjarri, vrasje, aksidente në komunikacion, përdhosjet e njerëzve në rrugë, janë përditshmëria e banorëve të RMV-së.

“Vetëm pak ditë më parë është plagosur një punonjës në Qendrën për Çështje Sociale në Prilep pasi është qëlluar me armë zjarri. Të shtëna ka pasur edhe në fshatin Moranë, ku një person ka mbetur i plagosur. Gjithashtu, në rrugët e qyteteve tona kanë ndodhur mbi 20 aksidente trafiku me të lënduar. Në Shkup janë shkelur një grua dhe një fëmijë. Aksidente trafiku me lëndime ka pasur edhe në Manastir, ku edhe një grua është përplasur me makinë, ndërsa 4 persona kanë mbetur të lënduar në Kavadar, por edhe në Shtip, Tetovë, Gostivar, Makedonska Kamenicë dhe Shkup. Siguria e qytetarëve nuk është në nivelin më të lartë.” tha ai.

Qytetarët duhet të ndihen të sigurt në rrugë, fëmijët duhet të rriten në një mjedis të sigurt dhe institucionet duhet të jenë në shërbim të njerëzve, u shpreh Ilievski.

Në zjarrin që ndodhi më 16 mars në një lokal nate në Koçani, kanë humbur jetën 59 persona, ndërsa kishte 196 të lënduar që trajtohen brenda dhe jashtë vendit.